Мектеп оқушысын қағып, қашып кеткен: Ақтөбеде 58 жастағы курьер табылды

Ақтөбеде электрвелосипед мінген курьер жас қызды қағып кетіп, оқиға орнынан қашып кетті. Зардап шеккен қыз ауыр жарақат алды. Полиция қызметкерлері жол апатына кінәлі адамды анықтады, деп хабарлайды Tengrinews.kz.

"Полиция курьерді іздеп жатыр"

Әлеуметтік желілерде үсті-басы қан болған қыздың суреттері тарады. Жарияланған кадрлардан оның алдыңғы тістеріне зақым келгенін көруге болады.

"Ақтөбеде велосипед мінген курьер жоғары жылдамдықпен мектеп оқушысын қағып кетіп, оқиға орнынан кетіп қалған. Полиция бейнебақылау камераларындағы жазбаларды зерттей отырып, курьерді іздестіріп жатыр", - делінген жарияланымда.

Ақтөбе облыстық полиция департаментінің мәліметінше, 30 шілдеде Әбілқайыр хан даңғылында электрвелосипед жүргізушісі велосипед айдап бара жатқан қызды қағып кеткен.

"Оқиғадан кейін ер адам зардап шегушіге қажетті көмек көрсетпестен, жол-көлік оқиғасы болған жерден кетіп қалған. Соқтығысу салдарынан кәмелетке толмаған қыз жарақат алды", - деп хабарлады полиция.

Қызметкерлер электрвелосипед жүргізушісінің жеке басын екенін анықтап, полиция бөліміне жеткізді. Ол қаланың 58 жастағы тұрғыны болып шықты.

Қазіргі уақытта жол-көлік оқиғасы дерегі бойынша сотқа дейінгі тергеу амалдары жүргізіліп жатыр. Полиция оқиғаның мән-жайын анықтап жатыр.

Бұған дейін Алматы маңында мопед жүргізушісі жоғары жылдамдықпен зейнеткерді қағып, қашып кеткен болатын. Жүргізуші жол қозғалысы ережелерін бұзып, жол-көлік оқиғасы болған жерден кетіп қалғаны үшін жауапкершілікке тартылды.

Google News арқылы жаңалықтарымызды қадағалаңыз