11 жерден пышақ сұққан : Шымкентте 21 жастағы қызды өлтірген күдіктінің психикалық ауытқуы мүмкін

Шымкент қаласындағы Төлеметов пен Өтегенов көшелерінің қиылысында аса ауыр қылмыс жасалды, – деп хабарлайды Aikyn.kz сайты. 

21 жастағы бойжеткен пышақ жарақатынан көз жұмды.

Оқиға 11 қаңтар күні кешке болған. Полицияның мәліметінше, күдікті ретінде 28 жастағы азамат анықталып, ұсталды. Ол уақытша ұстау изоляторына қамауға алынды. Тергеу мәліметтері бойынша, оқиға көпқабатты тұрғын үйдің маңында болған. Қазіргі таңда тергеу амалдары жалғасып жатыр.

Марқұм Нұрай Серікбайдың денесі туған ауылына жөнелтілді. Оның Түркістан облысы Төрткөл ауылында жерленетіні хабарланды. Жергілікті тұрғындар мен куәгерлер оқиға кезінде қыздың көмекке ұмтылғанын, жанжалдың алдын ала бірнеше күн бұрын да байқалғанын айтқан.

Ресми емес мәліметтерге сүйенсек, марқұм мен күдіктінің бұрын жеке таныстығы болған. Көршілердің айтуынша, соңғы күндері арасында жанжал болғаны байқалған. Ал тағы бір бейресми деректе жігіттің қызға 11 жерден пышақ жарақатын салғаны айтылады.

Кейбір әлеуметтік желі қолданушылары күдіктінің бұрыннан агрессивті мінез көрсеткенін және психологиялық мәселелері болуы мүмкін екенін жазды. Бұл деректерді құқық қорғау органдары тексеріп жатыр.

Қайғылы жағдай қоғамда үлкен резонанс тудырды. Желіде оқиғаға қатысты бейнежазбалар мен суреттер тараған. Полиция тарапынан видео материалдарға сараптама жасалып жатыр.

Құқық қорғау органдары оқиғаның барлық мән-жайын анықтауға кірісті. Қазіргі уақытта Қылмыстық кодекстің тиісті баптары бойынша іс қозғалып, тергеу амалдары жүргізіліп жатыр.