13 меншік иесі: жеке тұлға Ардагерлер паркі маңындағы жерді заңсыз алып, бөліп сатып жіберген

Бұл жөнінде 2026 жылғы 12 қаңтарда қадағалау органының баспасөз қызметі мәлім етті.

"Талдықорған қаласының прокуроры берген талап-арыз бойынша сот жеке тұлғаға "Ардагерлер паркі" аумағына іргелес 4,1 гектар жер телімін заңсыз беру фактісін танып, аталған жерді мемлекет меншігіне қайтару туралы шешім қабылдады", – делінген хабарламада.

Қадағалау барысында бұл жер телімінің орман-саябақ аймағына жататыны және 2006 жылы заңсыз түрде жекеменшікке берілгені анықталған.

"Кейіннен жердің иесі бұл аумақты 44 бөлек жер теліміне бөліп, оларды 13 жеке тұлғаға сатқан", – деп нақтылады Жетісу облысы прокуратурасының баспасөз қызметі.

Сот шешімі заңды күшіне енгені де атап өтілді.

Бұған дейін Қазақстанда 2,1 миллион гектар жер мемлекет меншігіне қайтарылғаны хабарланған болатын.