15 миллион қазақстандықтың төлқұжаттарының жылыстауы : министрлік даркнеттегі файлдарды тексерді

Желіде 15 миллион қазақстандықтың дербес деректері даркнетте жарияланғаны туралы ақпарат тарады. Жасанды интеллект және цифрлық даму министрлігі бұл мәліметті жоққа шығарды, деп хабарлайды Tengrinews.kz.

"Хакерлік шабуыл болған жоқ"

Министрлік уәкілетті органдармен бірлесіп техникалық тексеріс жүргізді. Олардың мәліметінше, eGov ақпараттық жүйелерінің бұзылуы анықталған жоқ.

Анықтама: eGov - азаматтар мен ұйымдарға мемлекеттік қызметтер мен анықтамаларды онлайн алуға, өтініш беруге, мемлекеттік баждар мен айыппұлдарды төлеуге, сондай-ақ өзге де цифрлық сервистерді пайдалануға мүмкіндік беретін мемлекеттік портал.

Ведомство eGov жүйесінің бұзылғаны және 15 миллион қазақстандықтың деректері тарап кеткені туралы ақпарат шындыққа жанаспайтынын хабарлады.

"Сонымен қатар біз darknet-те сатылымға шығарылған файлдарға қол жеткіздік. Оларды талдау барысында бұл әртүрлі белгісіз файлдар мен суреттердің жиынтығы екені анықталды және ЕGov жүйесінен алынған деректер базасының көшірмесі еместігі белгілі болды. Мұны растайтын басқа да фактілер бар. Атап айтқанда, жарияланған деректер массивінің көлемі мен мазмұны бір-біріне сәйкес келмейді. Бұдан бөлек, eGov жүйелерінде хабарландыру авторы көрсеткендей, паспорттардың скан-көшірмелері сақталатын база жоқ. Цифрлық құжаттар мүлдем басқа тәсілмен қалыптастырылады және сақталады. Сондықтан тағы да ресми түрде мәлімдейміз: eGov жүйесі бұзылған жоқ", - деп хабарлады министрлік.

Анықтама: Даркнет - бұл әдеттегі іздеу жүйелері арқылы қолжетімді емес және арнайы бағдарламалық қамтамасыз етуді қажет ететін интернеттің жасырын бөлігі. Анонимділік деңгейі жоғары болғандықтан, мұнда заңсыз сауда алаңдары мен басқа да құқыққа қайшы ресурстар жиі орналасады.

Ведомство өкілдері даркнеттегі анонимді хабарландырудың өзі жүйенің бұзылғанына немесе деректердің тарап кеткеніне дәлел бола алмайтынын баса айтты.

"Миллиондаған азаматтың дербес деректері туралы сөз болған жағдайда, ақпаратты белгіленген факт ретінде таратпас бұрын, ең алдымен оның шынайылығын мұқият тексеріп алған дұрыс", - деп толықтырды министрлік.

Еске сала кетейік, бұған дейін әлеуметтік желілерде белгісіз хакер 15 миллион қазақстандық туралы дерекқорды даркнетте сатуға шығарғаны туралы ақпарат тараған болатын. Желідегі хабарламаларға сәйкес, сатушы дерекқорды 0,5 биткоинге (шамамен 32 мың доллар) бағалаған. Онда азаматтардың дербес және байланыс деректері, соның ішінде паспорттық мәліметтері, телефон нөмірі, электрондық пошта мекенжайы, жұмыс орны туралы ақпарат, құжаттардың сканерленген нұсқалары мен құпиясөздер бар екені айтылған еді.

Бұл ретте әлеуметтік желілердегі хабарламаларға қарағанда, сатушы дерекқор eGov жүйесін бұзу нәтижесінде алынған деп мәлімдейді.

Тағы оқыңыз: Қазақстандық күтпеген жағдайда бөтеннің eGov аккаунтына кіріп кеткен: тексеріс басталды

Google News арқылы жаңалықтарымызды қадағалаңыз