2045 жылға қарай Германияда халық саны күрт қысқаруы мүмкін

Германияның Экономика институты мәліметінше, Германия халқы 2025 жылы шамамен 100 мың адамға азайып, 83,5 млн адам болады. Бұл 2010 жылдан бері алғаш рет тіркелген айтарлықтай төмендеу (2020 жылғы пандемия жылын есептемегенде).

Институт мұны көші-қонның енді халықтың табиғи азаюын өтей алмауымен түсіндіреді.

Бағалауға сәйкес, 2025 жылы елге келгендер саны кеткендерден небәрі 250 мың адамға ғана көп болған. Ал қайтыс болғандар саны туғандардан 350 мыңға артық болған. Салдарынан Германия халқының жалпы саны азайған.

Егер бұл үрдіс сақталса, 2045 жылға қарай ел халқы тағы 2,9%-ға қысқарып, 81,1 млн адамға дейін төмендеуі мүмкін.

Сарапшылар көші-қон одан әрі әлсіреген жағдайда халық саны тіпті 78 млн-ға дейін азаюы ықтимал екенін ескертеді. Бұл, олардың пікірінше, еңбек нарығына, зейнетақы жүйесіне және әлеуметтік сақтандыру жүйесіне түсетін жүктемені арттырады.

Осыған байланысты экономистер билікті шетелден білікті мамандарды белсендірек тартуға және шетелдік дипломдарды тану рәсімін жеделдетуге шақырады.

Айта кетелік Германияның ұшқыштар кәсіподағы екі күндік ереуіл жариялаған еді.