22 сағат қонбай ұшатын жолаушылар ұшағы жасалды

CNBC телеарнасының хабарламасына сүйенген Aikyn.kz алыс қашықтыққа жолаушылар тасымалдаудың ерекшеліктерін түсіндіреді.

Qantas әуе компаниясы тапсырыс берген, 22 сағат қонбай ұшатын Airbus A350-1000ULR моделі. Фото worldairlinenews.com сайтынан алынды

Аустралияның ұлттық тасымалдаушысы жұма күні (7 қараша) супер-ұзақ қашықтыққа ұшуға арналған Airbus A350-1000ULR моделінің алғашқы суреттерін көрсетті. Бұл ұшақ 2027 жылдан бастап Сиднейді Лондонмен және Нью-Йоркпен тікелей байланыстыратын алғашқы коммерциялық әуе лайнеріне айналады деп күтілуде. Арнайы конфигурацияланған бұл модель дүниежүзіндегі ең ұзақ коммерциялық рейстерді орындайтын болады. Суреттерде Тулузада (Франция) құрастырылып жатқан A350-1000ULR көрсетілген. Оның фюзеляж бөліктері, қанаттары, құйрық бөлігі және шассиі орнатылған. Qantas деректерінше, ұшақ осы аптада жаңа ангарға көшіріліп, оған қозғалтқыштар және сынақ жабдықтары қойылады.

2025 жылы басталатын кең ауқымды ұшу сынақтары аяқталғаннан кейін, алғашқы коммерциялық рейстерді 2027 жылдың алғашқы жартысында бастау жоспарланған.

Qantas бас директоры Ванесса Хадсон бұл жетістік компанияның Project Sunrise бастамасын жүзеге асыруға жақындай түскенін айтады. Бұл бастаманың атауы екінші дүниежүзілік соғысы кезінде Qantas орындаған өте ұзақ рейстерге меңзейді. Сол ұшақтар бір сапарда екі рет күннің шығуын көрген.

A350-1000ULR ұшағы қосымша 20 000 литрлік жанармай багының және жаңартылған техникалық жүйелердің арқасында 22 сағатқа дейін тоқтаусыз ұша алады. Бұл АҚШ пен Ұлыбританияға баратын жолаушылар үшін жол уақытын қазіргі бір рет ауысып міну маршрутымен салыстырғанда 4 сағатқа дейін қысқартпақ. Алайда бұндай ұзақ рейстер бірқатар мәселе тудырады. Сарапшылар ұзақ әуе сапарының жолаушылар жайлылығы мен экологиялық әсеріне алаңдаулы.

Тулузада (Франция) құрастырылып жатқан A350-1000ULR ұшағына фюзеляж бөліктері, қанаттары, құйрық бөлігі және шассиі орнатылған. Фото cnbc.com сайтынан алынды. Авторлығы: Qantas

Жұма күні Qantas акциялары 6,5% төмендеп, соңғы алты айдағы ең төменгі деңгейге түсті. Инвесторлар болжамдарды әлсіз деп қабылдаған. Ал Airbus акциялары Париж биржасында сәл төмендегенімен, жыл басынан бері 35% өсім көрсетуде.

Qantas супер-алыс қашықтыққа ұшатын жаңа ұшақпен халықаралық авиацияның мүмкіндігін кеңейтпек. Бұл жоба Сиднейді әлемнің ең ірі қалаларымен тоқтаусыз байланыстырып, саяхат уақытын айтарлықтай қысқартады. Дегенмен жолаушылар жайлылығы, экология және экономикалық тәуекелдер бұл бастаманың табысына әсер ететін негізгі факторлар болып қалуда.

Бүгінді ұзақ қашықтықтағы тікелей әуе рейстерін негізінен Qantas (Australia), Singapore Airlines, Emirates, Qatar Airways сияқты ірі халықаралық әуекомпаниялар орындайды. Әсіресе, Singapore Airlines Сингапур – Нью-Йорк бағытымен әлемдегі ең ұзақ коммерциялық рейс (19 сағат) орындайды. 

Ұзақ рейстерде жолаушылар жайлылығына ерекше көңіл бөлінеді. Бизнес және премиум-эконом санаттарында жатуға болатын кең орындар, жеке капсулалар қарастырылған. Эконом санатында да орындардың артқы тіреулері, аяқ кеңістігі және тағам сапасы жақсартылып келеді. Кей авиакомпанияларда салон ішінде созылу аймақтары, жерде тұрып дене жаттығуын жасауға арналған орындар, жарықты табиғи ритмге сәйкестендіретін динамикалық жарық жүйелері бар.

Ұзақ әуе сапарларындағы негізгі мақсат – ұйқыны қалыпқа келтіру, қан айналымын жақсарту және стресс болдырмауды азайту.

Әлемдегі ең жайлы Emirates ұшақтары

Emirates - жолаушылар жайлылығы жағынан әлемде ең жоғары бағаланатын авиакомпаниялардың бірі. Олар ұзақ рейстерде жайлылықты ерекше деңгейге жеткізген. Emirates негізінен A380 және B777 ұшақтарын қолданады. Бұл ұшақтар ұзақ рейстер үшін кең, тыныш, тұрақты және жолаушыларға жоғары деңгейлі жайлылық ұсынады. Оларда жолаушылдар үшін ерекше жағдай жасалған, қызмет жоғары деңгейде көрсетіледі:

Эконом-класс: орындары кең, арқалықтары ыңғайлы, аяқ қоятын орын жеткілікті. Жеке мультимедиалық экрандарда 5000+ фильм, музыка, ойындар бар. Тамақ әрдайым ыстық және таңдау мүмкіндігі мол.

Премиум-эконом: бұл орындар бизнес-кластан кем емес. Креслолар кең, терең иіледі, арқалық пен аяқ тірегі жақсы реттеледі. Коктейльдер, жеке әйнек стақандар, сапалы тағам беріледі.

Бизнес-класс: әр жолаушыға жеке капсула беріледі. Олар толық төсекке айналады, жеке есік немесе бөлгіштер арқылы жеке кеңістік жасалады. Бар-аймақ (lounge) бар, онда еркін қыдырып, сусын ішуге болады.

Бірінші класс (First Class): жеке кабиналар немесе люкс бөлмелер, душ қабылдайтын жеке ванна бөлмесі, жеке аспаз дайындаған мәзір.

Осының бәрі Emirates ұзақ рейстерде жайлылықты «қажетті деңгейде» емес, ерекше, люкс деңгейге жеткізіп ұсынатынын көрсетеді. Сол себепті әлем бойынша жолаушылар Emirates компаниясын ұзақ сапар үшін жиі таңдайды.

Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.