22 сағат аспанда: жолаушылар тарихтағы ең ұзақ әуе сапарына дайын ба

Әуе компаниясы тарихтағы ең ұзақ коммерциялық рейстерді — аялдамасыз 22 сағатқа дейін созылатын ұшуларды іске қосуға дайындалып жатыр. Жаңа бағыт Сидней қаласынан Лондон және Нью-Йорк қалаларына жалғасады.

Ұшулар арнайы түрлендірілген Airbus A350-1000ULR (Ultra Long Range) ұшағымен орындалады. Бұл ұшақтар қосымша жанармай багының арқасында әуеде ұзақ уақыт бола алады.

Қазіргі уақытта ең ұзақ тұрақты рейсті Singapore Airlines орындайды. Ньюарк пен Сингапур арасындағы ұшу шамамен 18,5 сағатқа созылады.

Жаңа ұшақтардың басты ерекшелігі — «жақсы көңіл-күй аймағы» (wellbeing zone). Бұл — барлық жолаушыларға қолжетімді, салондар арасындағы арнайы кеңістік. Мұнда бой жазып, бейненұсқаулықтар бойынша жаттығу жасауға, сондай-ақ сусындар мен жеңіл тағамдар алуға болады. Бұл тұжырымдама джетлаг әсерін азайтуға және ұзақ ұшу кезіндегі жағдайды жақсартуға бағытталған.

Стандартты A350-1000 ұшағы 300-ден астам жолаушыға есептелген болса, Qantas ұшақтары 238 адамды ғана тасымалдайды. Бос кеңістік жайлылықты арттыруға жұмсалған: ұзындығы шамамен екі метр болатын жеке төсегі бар алты бірінші класты люкс, толық жататын креслолары бар 52 бизнес-класс орны, 40 премиум-эконом және 140 эконом-класс орны қарастырылған.

Барлық жолаушылар жоғары жылдамдықты Wi-Fi желісіне қол жеткізе алады, сондай-ақ Bluetooth құлаққаптарын борттық ойын-сауық жүйесіне қосуға мүмкіндік болады.

Жоба Project Sunrise деп аталады. Ол алғаш рет 2017 жылы жарияланған, алайда COVID-19 пандемиясына байланысты мерзімдер кейінге шегерілді. Рейстерді іске қосу 2027 жылдың бірінші жартысына жоспарланып отыр.

Бұған дейін жолаушылар ағыны бойынша көшбасшы әуежайлар туралы жаздық.

Ал былтыр Ақ үй Қатар корольдік отбасымен Boeing 747 люкс ұшағын президенттік борт (Air Force One) ретінде пайдалану үшін АҚШ-қа беру туралы келіссөз жүргізген болатын.