29 наурыз. Тұлғалар туған күн

ЕСІМДЕР

55 жыл бұрын (1971) кескіндемеші, ҚР Көркемсурет академиясының мүшесі, ЮНЕСКО жанындағы сыншылар мен өнертанушылар халықаралық қауымдастығының мүшесі Ботагөз Амандосқызы АҚАНАЕВА дүниеге келді.

Фото: Kazinform

Алматы облысында туған. 1990 жылы Н. В. Гоголь атындағы Алматы көркемсурет училищесінің театр және декорация бөлімін театр декораторы мамандығы бойынша бітірген, 1997-1999 жылдары Фабрис де Вильневтің кескіндеме студиясында білім алған.

«Тоқыма, керамиканы енгізе отырып рельефтік кескіндеме жасауға» патенті бар (1997). Бейнелеу өнерінің түрлері — кескіндеме, графика, мүсін, дизайн. 1990-1993 жылдары Абай атындағы Мемлекеттік академиялық опера және балет театрының декораторы болды. Отандық және халықаралық «Жігер» (Алматы қаласы, 1991), «Рождественские сказки» (Мәскеу қаласы, 1993), «7 галерея» (Мәскеу қаласы, 1995), «АРТ-МИФ» (Мәскеу қаласы, 1993), «ҚР суретшілері» (1998), «Ботагөз Монреалда» (Монреаль қаласы, 1999), «Ұлы көшпенділердің алаулары» (Астана қаласы, 2001), «Реализм шектері» (2004), «Адамдар мен қоныстар» (БҰҰ желісі бойынша, Алматы қаласы, 1994) көрмелеріне қатысқан. Еңбектері «Шығыс галереясында» (Мәскеу қаласы), «Ұласу Артта» (Алматы қаласы), Третьяков галереясында (Мәскеу қаласы), «NordTa» (Монреаль қаласы, Канада), «ОЮ-да» (Алматы қаласы), «Ұмай Тәңіріде» (Алматы қаласы), «Шежіреде» (Астана қаласы), Ә.Қастеев атындағы мемлекеттік өнер мұражайында қойылған.

Шығармаларының басым көпшілігі әртүрлі техникалар мен материалдарды пайдалану арқылы рельефтік кескіндеме техникасында орындалған. Еңбектері Третьяков галереясы (Мәскеу қаласы), Ә. Қастеев атындағы мемлекеттік өнер мұражайы (Алматы қаласы), Виллафамес қазіргі өнер мұражайы (Испания), Монреаль қаласының муниципалдық мұражайы (Канада), Канада генерал-губернаторының мұражайы (2000) жинақтарында, сондай-ақ Қазақстан, Ресей, АҚШ, Канада, Франция, Испания, Италия, Израиль, Германия, Түркия, Мысыр және басқа да елдердің жекеменшік коллекцияларында сақталған.

ҚР Суретшілер одағы жастар бірлестігінің мүшесі. ЮНЕСКО жанындағы Халықаралық сыншылар және өнертанушылар қауымдастығының (АІСА) толық мүшесі (1996). БҰҰ желісі бойынша арнаулы сыйлықтармен марапатталған. Мәдениет қайраткері.

51 жыл бұрын (1975) Алматы қаласы Жетісу ауданының әкімі Ләззат Әуесханқызы ЖЫЛҚЫБАЕВА дүниеге келді.

Фото: Алматы әкімдігі

Алматы облысы Күрті ауданы Каскелен-Топар ауылында туылған. 1996 жылы Қыздар педагогикалық университетін, 2000 жылы Қыздар педагогикалық университетін, 2007 жылы Х. А. Ясауи Халықаралық қазақ-түрік университетін бітірген.

Еңбек жолы: 1996-2006 жылдары № 1 Алматы қазақ педагогикалық колледжінің тарих пәнінің мұғалімі. 2006 жылы Алматы қаласы Білім басқармасының аттестаттау және лицензиялау бөлімінің бас маманының м. а., 2006-2007 жылдары Алматы қаласы Білім басқармасының аттестаттау және лицензиялау бөлімінің бас маманы, 2007-2012 жылдары Алматы қаласы Білім департаментінің аттестаттау және лицензиялау бөлімінің бастығы, 2012-2016 жылдары Алматы қаласы Білім басқармасының техникалық және кәсіптік білім беру бөлімінің басшысы болып қызмет атқарды. 2016-2019 жылдары Алматы қаласы Білім басқармасы басшысының орынбасары лауазымын атқарды.

2024 жылдың шілде айынан бастап қазіргі қызметінде.

«Құрмет» орденімен марапатталған.

45 жыл бұрын (1981) Мұхтар Әуезов атындағы Оңтүстік Қазақстан ұлттық университетінің ректоры Дархан Жұмақанұлы АХМЕД-ЗАКИ дүниеге келді.

Фото: ҚР Ғылым және жоғары білім министрлігі

Шығыс Қазақстан облысында дүниеге келген. Әл-Фараби атындағы Қазақ Мемлекеттік университетін, Қ. Сәтбаев атындағы Қазақ Мемлекеттік Техникалық университетін бітірген.

Еңбек жолын 2002 жылы Алматы қаласындағы Республикалық медицина колледжінде физика және математика пәндерінің оқытушысы болып бастаған. 2003 жылы Жаңаөзен қаласында «Қазақойл» ЖАҚ технологиялық зерттеулер орталығының инженер-бағдарламашысы болып жұмыс істеді. 2004-2012 жылдары Әл-Фараби атындағы ҚазҰУ механика-математика факультетінің ассистенті, оқытушысы, аға оқытушысы, доценті, деканның оқу-тәрбие жұмысы жөніндегі орынбасары, «Информатика» кафедрасының меңгерушісі, 2012-2013 жылдары Әл-Фараби атындағы ҚазҰУ механика-математика факультетінің деканы, 2013-2016 жылдары Әл-Фараби атындағы ҚазҰУ оқу жұмысы жөніндегі проректор, 2016-2017 жылдары ҚР Білім және ғылым министрлігінің Жоғары және жоғары оқу орнынан кейінгі білім департаментінің директоры болып қызмет атқарған. 2017-2020 жылдары Халықаралық бизнес университетінің президенті, 2020-2022 жылдары Astana IT University ректоры, 2022-2023 жылдары ҚР Ғылым және жоғары білім министрлігі Ғылым комитетінің төрағасы лауазымын атқарды.

Қазіргі қызметін 2025 жылдың қаңтар айынан бері атқарып келеді.

43 жыл бұрын (1983) Қазақстан Республикасы Президенті Әкімшілігінің Ішкі саясат бөлімі меңгерушісінің орынбасары Еділ Сабырұлы ОСПАН дүниеге келді.

Фото: Солтан Жексенбеков / Kazinform

Түркістан облысында дүниеге келген. А. Яссауи атындағы Халықаралық қазақ-түрік университетін; Қазақ гуманитарлық-заң университетін; Эксетер университетін (Ұлыбритания) бітірген. Заң ғылымдары докторы дәрежесі.

Еңбек жолы: Алматы қаласының құқық және экономика колледжінде оқытушы (2004); Қазақ гуманитарлық-заң университетінде оқытушы, Л. Н. Гумилев атындағы Еуразия ұлттық университетінде аға оқытушы, Қазақстан Республикасы Президенті жанындағы Мемлекеттік басқару академиясының жетекші ғылыми қызметкері; Қазақстан Республикасы Парламенті Мәжілісі депутатының көмекшісі (2007); Қазақстан Республикасы Президенті Әкімшілігінің Қазақстан халқы Ассамблеясы хатшылығының сарапшысы, инспекторы (2010); «Нұр Отан» партиясының Қоғамдық саясат институты директорының орынбасары (2019); Қазақстан Республикасы Ақпарат және әлеуметтік даму министрінің кеңесшісі (2020); Қазақстан Республикасы Премьер-Министрі Кеңсесінің Әлеуметтік-мәдени даму бөлімінің меңгерушісі (02.2021-02.2023); Үкімет Әкімшілігінің Әлеуметтік даму бөлімінің меңгерушісі (2023); Қазақстан Республикасы Білім вице-министрі (2023-2025).

2025 жылдың қыркүйек айынан бастап қазіргі қызметінде.

130 жыл бұрын (1896-1986) қазақтың атақты шопаны, екі мәрте Социалистік Еңбек Ері Жазылбек ҚУАНЫШБАЕВ дүниеге келген.

Фото: 7-su.kz

Жамбыл облысы Мойынқұм ауданында туған. 1936-1967 жылдары — Жамбыл облысы Көктерек, Айдарлы қой өсіретін ұжымшарларында аға шопан. 1948 жылы –әр жүз саулықтан 130-дан төл алған, ал 1958 жылы әр жүз саулықтан 145-тен қозы алған. Ол өсірген қаракөл қойларының елтірілері халықаралық көрмелерде, жәрмеңкелер мен Дели (Үндістан), Бухарест (Румыния), Познань (Польша), Нью-Йоркте (АҚШ) өткізілген аукциондарда көрсетілді. Оның есімі Қазақстанның Алтын Құрмет кітабына жазылған. Айдарлы ұжымшарында оның қой өсіру жөніндегі тәжірибесін үйрететін алғашқы мектеп ұйымдастырылып, Бірлік ауылында гранит тұғырға бюсті орнатылған. 3-4-ші сайланған Қазақ КСР Жоғарғы Кеңесінің депутаты болған.

Ленин орденімен, «Орақ және балға» алтын медалімен және басқа да медальдармен марапатталған.

61 жыл бұрын (1965-2025) Қазақстан Республикасының саясат қайраткері Наталья Васильевна ЖҰМАДІЛДАЕВА дүниеге келді.

Фото: ҚР Оқу-ағарту министрлігі

Қарағанды облысының Теміртау қаласында дүниеге келген.

1987 жылы Мордова АКСР Саранск қаласындағы Н. П. Огарев атындағы Мордова мемлекеттік университетін «Француз тілі және әдебиетінің мұғалімі» мамандығы бойынша бітірген.

Еңбек жолын 1987 жылы бастауыш сынып мұғалімі болып бастаған. 2004-2013 жылдары Қызылорда қаласындағы № 112 және Ж.Қизатов атындағы № 23 ОМ директоры болды. 2013-2015 жылдары Қызылорда қаласы Білім бөлімі бастығының орынбасары қызметін атқарды. 2015-2016 жылдары Қызылорда қаласы Оқушылар мен жасөспірімдер үйінің директоры болды. 2016-2021 жылдары ҚР Парламенті Мәжілісінің VI шақырылым депутаты, Халықаралық істер, қорғаныс және қауіпсіздік комитетінің мүшесі қызметінде болды. 2022 жылы Педагогикалық шеберлік орталығы директорының білім беру бағдарламалары және халықаралық ынтымақтастық жөніндегі орынбасары, 2022-2023 жылдары ҚР Оқу-ағарту министрлігі Мектепке дейінгі білім департаменті директорының м. а., директоры лауазымын атқарды.