56 тонна қымыз: Астанада BaiQymyz 2026 фестивалі өтіп жатыр

Іс-шара аясында еліміздің түкпір-түкпірінен және Ресейден келген 59 қымыз өндіруші қонақтарға 56 тонна қымыз ұсынып, КИнЭС рекордын жаңартты.

Жалпы жүлде қоры 45 миллион теңгені құрайтын байқау аясында «BaiQymyz-2026», «Ем қымыз» және «Халық таңдауы» аталымдары бойынша үздіктер анықталады. Жеңімпаздарға ақшалай және бағалы сыйлықтар табысталып, бас жүлде иесіне автокөлік беріледі.

Қазақтың қымызы Нью-Йоркте алтын жүлде жеңіп алды

Ұйымдастырушыларлың айтуынша, жобаның 11 шілдеде басталуының өзіндік  мәні бар.

«Халқымыз 6000 жылдан бері ат мініп, қымыз ішіп келеді. Екінші рет ұйымдастырылып отырған фестиваль биыл 11 шілде – Халықаралық жылқы күніне тұспа-тұс келіп отыр. Ата-бабамыз осы ұлан-ғайыр жерді жылқының күшімен сақтап қалған. Сондықтан осы асыл мұрамызды бірге дәріптеуіміз керек», деді жоба авторы Жұмажан Қалтаев.

Фестиваль бағдарламасы аясында ұлттық ат спорты ойындары көрсетіліп, суретшілер мен қолөнершілердің көрмелері ұйымдастырылды. Келушілер Er qanaty жылқылар шеруін, көкпар мен шөген, аударыспақ ойындарын тамашалады.

Атыңнан айналайын, Қарқаралы! Арқадағы қымыз фестиваліне 20 мың турист келді

Сондай-ақ фестивальде ұлттық тағам өндірушілері де өз өнімдерін ұсынды. Этнограф Саяхат Әсімханның айтуынша, мүндай бастамалардың ұлттық кодты жаңғыртуда маңызы зор.

«Фестивальдің «BaiQymyz» аталуының  да өзіндік мән-мағынасы бар. Сан ғасырлар бойы отарлық саясат санамызға бай ұғымының жағымсыз екендігін сіңдіріп келді. Енді осы түсініктен арылатын уақыт келді. Еліміздің азаматтары бақуатты, бай болуы керек. Себебі әр халық түптеп келгенде тек өзінің ерекшеліктері арқылы дами алады», деді Саяхат Әсімхан.

BaiQymyz-2026 гастрофестивалі екі күнге жоспарланған. Фестивальдің екінші күнінде «Ең үздік қымыз» байқауының жеңімпаздары анықталып, марапаттау рәсімі өтеді.

Еске сала кетейік, бұған дейін Ақмола облысында мектеп оқушысы жусан иісімен әтір жасап шығарған болатын. Сұлтан Бейбарыс туралы аңыздан шабыт алып дайындалған хош иісті әтір «Елім-ай» деп аталады.