8,5 млн теңге: қомақты инвестициялық дивидент күткен ақмолалық алаяққа ұрынды

Ақмола облысы полиция департаментінің баспасөз қызметінің мәліметінше, ірі интернет-алаяқтықтың құрбаны Аршалы ауданының тұрғыны болған.

— Алғашқы тергеу әрекеттері барысында анықталғандай, өтініш беруші жалған «ҚазАтомПром» инвестициялық платформасының жарнамасын TikTok қосымшасынан көрген. Алаяқтар әлеуетті салымшылардың сеніміне кіру үшін белгілі компанияның атауын пайдаланған. Жарнамада пайдаланушыларға мұнай, алтын және күміс сияқты шикізат ресурстарына инвестиция салудан жоғары табыс уәде етілген, — деп мәлімдеді ведомство.

Тіркеуден өткеннен кейін ақмолалықпен өзін компанияның «менеджері» ретінде таныстырған адам байланысқа шыққан. Ол инвестициялау жүйесі туралы егжей-тегжейлі айтып, салынған қаражаттың жоғары табыс әкелетініне сендірген. Жылдам пайда табуға үміттенген азамат оның сөзіне сеніп, көрсетілген шоттарға ақша аудара бастаған.

Жалпы алғанда, ер адам дропперлердің шоттарына 10 транзакция арқылы 8 миллион 850 мың теңге аударған. Қаражатты алғаннан кейін алаяқтар байланысқа шығуын тоқтатқан. Уәде етілген дивидендтер түспеген соң, жәбірленуші алаяқтардың құрбаны болғанын түсініп, полицияға арызданған.

— Аталған факт бойынша сотқа дейінгі тергеу басталды. Қылмысқа қатысы бар тұлғаларды анықтау мақсатында жедел-іздестіру шаралары жүргізіліп жатыр, – деді полиция өкілдері.

Полицейлер азаматтарды тағы да ескертеді: соңғы уақытта «инвестициялық платформаларға» байланысты интернет-алаяқтық фактілері көбейген. Қаскөйлер әлеуметтік желілер мен мессенджерлерде белсенді түрде жарнама таратып, жоғары әрі тез табыс табуға уәде береді.

Айта кетейік, бұған дейін БҚО-да алаяқтар жәбірленушілерге 260 млн теңгеден аса залал келтіргенін жаздық.