Әдемі нөмірге әуестік

Egemen.KZ парақшасынан алынған деректерге сүйене отырып, Qazaq24.com хабарлама жасады..

Биыл 5 қаңтардан бастап елімізде әрбір азамат көлігіне мемлекеттік тіркеу нөмірін ресми әрі заңды түрде таңдай алады. Қазір халықтың басым бөлігі жүргізуші екенін, ал автокөліктің тұрмыста негізгі мініс құралына айналғанын ескерсек, бұл жаңалық көпшілік көңілінен шыққаны анық. Қысқасы, «әдемі» нөмірге қызығушылар қатары әлі де азайған жоқ.

Коллажды жасаған – Қонысбай ШЕЖІМБАЙ, «EQ»

Жыл басынан бері автокөлік иелерінен 19 100 өтініш түскен. Қашан да сұранысқа ие бұл қызметке қатысты Алматы қаласының Өңірлік коммуникациялар қызметінде Алматы қалалық Полиция департаменті Әкімшілік полиция басқармасының бастығы Серік Шумаев бірқатар мәлімет ұсынды. Оның айтуынша, енді мемлекеттік тіркеу нөмірі автоматты түрде ғана берілмей, азаматтар ұсынылған нұсқалардың ішінен өзіне ұнаған әріп-сан үйлесімін таңдай алады.

Басқарма бастығының айтуынша, бұл қызмет мемлекеттік қызмет көрсету тетігін түбегейлі өзгертіп, азаматтардың таңдау құқығын кеңейтуге бағытталған. Мемлекеттік нөмірді өз қалауы бойынша таңдау мүмкіндігін енгізу бірқатар түйткілдің түйінін тарқатады. Атап айтқанда, бастама халыққа қолайлы болып, жаңа нөмір беру үдерісінің бармақ басты, көз қысты әрекеттерсіз, ашық әрі әділ жүргізілуін қамтамасыз етеді. Сондай-ақ бұл жаңашылдық мемлекеттік қызметтерді цифрландыруға арналған ауқымды бағдарламаның құрамдас бөлігі саналады.

«Мемлекеттік нөмірлердің бірнеше санаты қарастырылған. Олардың құны 10-нан 280 айлық есептік көрсеткішке (АЕК) дейін барады. Баға автокөлік иесі таңдаған сандық немесе әріптік комбинацияға байланысты. Мемлекеттік нөмірлерді сатып алудан түскен қаражат қала бюджетіне түседі. Бірдей үш саннан тұратын, басында немесе соңында нөлдері бар нөмірлерге сұраныс өте жоғары», дейді С.Шумаев.

Қазір азаматтар нөмір таңдау мақсатында мамандандырылған халыққа қызмет көрсету орталықтары арқылы өтініш бере алады. Алдағы уақытта бұл қызмет онлайн форматта – электрондық үкімет порталы мен мобильді қосымшалар арқылы да қолжетімді болады. Бұл ХҚО-ларға түсетін жүктемені азайтып, жұмысты барынша ыңғайлы етуге мүмкіндік бермек.

Қызмет көрсету рәсімі қарапайым әрі түсінікті, яғни азаматтар жүйедегі қолжетімді сан үйлесімдерінен керек нөмірді таңдап, тексеруден өтіп, қызмет ақысын төлеп, содан кейін өтініш береді. Бұл үдерістер бақыланады және ашық өтеді. Әдепсіз әрі жағымсыз мағына беретін нөмірлерді жасауға ғана жол берілмейді.

«Әріптік және сандық комбинациялар жалпы қабылданған моральдық нормаларға сай болуға тиіс. Біз мұны алдын ала ескертеміз, яғни балағат сөздер немесе біреудің ар-намысы мен қадір-қасиетіне нұқсан келтіретін жазуы бар нөмірлер болмайды. Барлығы әдептен аспауы керек», дейді Алматы қалалық Полиция департаментінің ресми өкілі Салтанат Әзірбек.

Ішкі істер органдарында көлік құралдарын тіркеу саласындағы өзгерістер сервистік тұрғыдан ғана емес, «Заң және тәртіп» қағидаттарын қамтамасыз ету үшін де маңызды екенін атап өтті. Нақты есепке алу, бірыңғай ережелер мен ашық рәсімдер көлік қауіпсіздігіне, көліктерді іздестіру мен азаматтардың құқықтарын қорғау жұмысына да тікелей әсер етеді.

АЛМАТЫ

Соңғы жаңалықтар