Әйел аманаты : AMANAT партиясы жаңа бастаманы қолға алды

Мемлекет басшысы Қасым-Жомарт Тоқаев әйелдердің қоғамдағы рөлін арттыруға, оларды барынша қорғауға және жан-жақты қолдауға әрдайым баса мән беріп келеді. Осы орайда «AMANAT» партиясының Әйелдер қанаты «Әйел аманаты» бастамасын іске асырып жатыр. Бұл жоба түрлі салада еңбек етіп жүрген белсенді әрі жауапкершілігі жоғары әйелдерді біріктіріп, ел дамуына үлес қосуға бағытталған ортақ ынтымақтастық алаңын қалыптастырады, – деп хабарлайды Aikyn.kz. 

Алматы облысы Іле ауданына қарасты Байкент ауылында «AMANAT» партиясы Әйелдер қанатының «Әйел аманаты» бастамасымен кәсіпкер әйелдердің кездесуі өтті. Іс-шараға 200-ге жуық адам қатысты. Олар – депутаттар, мемлекеттік қызметшілер, кәсіпкерлер, өзге де саланың үздік мамандары және көпбалалы аналар.

Түрлі сала мамандарының үздіктері бас қосқан жиында әйелдердің қоғамдағы рөлі мен «AMANAT» партиясы Әйелдер қанатының бастамалары талқыланды. Кездесудің басты мақсаты – өңір әйелдерінің көшбасшылық әлеуетін арттыру және олардың партиялық, қоғамдық және әлеуметтік бастамаларға белсене араласуын қамтамасыз ету. Сондай-ақ жиын қоғамдық бастамаларды іске асыру бойынша тәжірибе алмасып, жаңа идеялар мен серіктестік жобалар ауқымын кеңейтуге жол ашады.

«AMANAT» партиясының Алматы облыстық филиалы жанындағы «Әйелдер қанаты» консультативтік-кеңесші органы жөніндегі кеңес төрағасы Меруерт Молдашева бүгінде партия құрамындағы әйелдердің үлесі 60 пайыздан асатынын, ал 4 мыңнан астам бастауыш партия ұйымының ішінде 2,5 мыңға жуық әйел адам басшылық қызмет атқаратынын атап өтті. Оның айтуынша, бұл – әйелдердің партия өміріндегі белсенділігінің және олардың қоғамдық пікір қалыптастырудағы рөлінің айғағы.

«AMANAT» партиясы әйелдердің әлеуетін дамытуға, олардың қоғамдық және саяси белсенділігін арттыруға үлкен мән береді. Соңғы жылдары елімізде әйелдер қанаты белсенді жұмыс істеп келеді. Соның нәтижесінде, әйел көшбасшылығы мен олардың құқықтарын қорғауға бағытталған он негізгі басымдық айқындалды. Бұл жүйелі тәсіл гендерлік мәселелерді шешуге және нақты өзгерістерге жол ашады. Мұндай жобалар тек білім беру мақсатында ғана емес, сонымен қатар жергілікті деңгейде әлеуеті жоғары көшбасшыларды анықтап, партияның кадрлық резервін жасақтау үшін де маңызды. Біз дәстүрлі кездесулерден гөрі нақты нәтижеге бағытталған форматқа көшуіміз керек. Біздің мақсат – жаңа есімдерді таныту. Сол арқылы әйелдердің партия ішіндегі және қоғамдағы көшбасшылығын күшейту», – деді ол.

Ашық диолог форматында өткен жиында спикерлер әлеуметтік кәсіпкерлікті дамытудан бастап, гендерлік теңдік, әлеуметтік көмек жүйесін жетілдіру және тұрмыстық зорлық-зомбылықтың алдын алу сияқты мәселелерге дейін сөз қозғады. Сондай-ақ іс-шара барысында әйелдердің көшбасшылық қабілеттерін жетілдіруге арналған оқыту мен тренингтердің жаңа форматы таныстырылды.

«Бүгінде әйелдердің әлеуетін ашу – қоғам дамуының стратегиялық басымдығы. Біз кәсіби білімі және азаматтық ұстанымы бар жаңа буын көшбасшы әйелдерді дамытуға баса мән береміз. «AMANAT» партиясының қолдауымен мықты мамандарды оқытып, олардың тәжірибесін ел игілігіне бағыттауды көздейміз. Әйелдер бизнесте де, саясатта да тең дәрежеде қатысуы керек. Бұл – әділетті әрі дамыған қоғамға апарар жол», – деді Алатау қаласы мәслихатының төрағасы Роза Әбілова.

Жиында қатысушылар өз тәжірибелері мен табысты жобаларымен бөлісті. Іле ауданынан келген кәсіпкер Жеңісгүл Дәулетова ұлттық бұйымдар мен киімдер өндірісімен айналысып, оларды шетел көрмелерінде таныстырып жүр. Ол 2023 жылы «Бір ауыл – бір өнім» республикалық жобасының финалына өтіп, 2024 жылы «AMANAT» партиясының қолдауымен «Жан Шуақ» қоғамдық сыйлығының лауреаты атанған.

«Қолөнер – мен үшін табыс көзі ғана емес, елге қызмет етудің, ұлттық болмысты сақтаудың, өз еңбегіңмен өзгеге үлгі болудың жолы. Әйел адамның қолынан келмейтін іс жоқ, тек сенім мен табандылық керек. Әйелдің күші – мейірім мен жауапкершілікте. «AMANAT» партиясының «Әйел аманаты» бастамасы біз үшін өз әлеуетімізді танытуға үлкен мүмкіндік беріп отыр. Бір-бірімізге қолдау білдірсек, қоғам да, ел де дамиды», – деді Жеңісгүл Дәулетова. 

Айта кетейік, «Әйел аманаты» бастамасы аясында әйелдер үшін саяси көшбасшылық, коммуникация, жобалық менеджмент, цифрлық сауаттылық бойынша тренингтер мен семинарлар өткізіледі. Сонымен қатар тәжірибелі саясаткерлер мен қоғам белсенділері ментор ретінде қатысушыларға бағыт-бағдар береді.

Сараптама, зерттеу мақала, күнделікті өзекті ақпаратты «Айқынның»  TELEGRAM арнасынан табасыз.