Айқын мақсат, белгілі меже

Осы жылдың қорытындысы бойынша көңіл қуантар нәтиже көп. Әсіресе, «Жер аманаты»  мен «Ауыл аманаты» жобасы ауыл тұрғындары тарапынан кең қолдау тауып отыр.

БҚО бойынша партия бас­тамасымен тек биылдың өзінде 120 280 гектар жер мемлекет мен­шігіне қайтарылып, оның 38 мың гектары кері пайдалануға беріліп отыр. Ауылдағы ағайын үшін жер мәселесі қашанда өзекті. Жайы­лым жер үшін талай дауды бастан да кешіріп отыр. Осы жер дауымен облыстық партия табалдырығын тоздыра­тындар аз емес. Бірі жайылым жер сұраса, екіншісі егістік үшін жер сұрайды. Жерді бәлен гек­тарлап алып алған қожалықтар ауыл халқының малын жайғыз­байтын кездер де жиі кездеседі. Осындай қиын­дықпен бетпе-бет келген ағайын­ның бәрі облыстық партияның қабылдау бөліміне жазылады. 

– Жер мәселесі күн тәр­ті­бінен түскен емес. Партияның қабылдау бөліміне осы сұрақпен келетін адам санына қарап біз осыны айта аламыз. Қазір біз аудан әкімдері мен ауыл әкімдері арқылы ауылдық жердегі пайда­ланылмай жатқан жер телімдерін қайтару мәселесімен айналысып жатыр­мыз. Сот процестері де бар жүріп жатқан. Ауылдық жерде отырып кәсіп бастаған жас аза­маттар қабылдауға келеді.  Бос жатқан жер көп, бізге берілмейді деп шағымданады. Ал заң жүзін­де ол жер бір қожалыққа тиесілі. Осындай мысал көп. Ол қожа­лық­тан жерді алу, оны кері мем­лекет меншігіне қайтару жұмыс­тарын партия үздіксіз атқарып келеді, – дейді облыстық партия­ның атқарушы хатшысы Азамат Сафималиев. 

Партияның тағы бір сәтті жобасы бұл – Ауыл аманаты жобасы. Осы жобаның арқасын­да өңірде жұмыссыздық деңгейі азайып, кәсіпке бет бұрғандар саны артты. 

БҚО-да «Ауыл аманаты» жобасы  басталғалы 14,4 млрд теңгеден астам қаржы бөлініп, 1 391 микрокредит берілген. Төмендетілген несиенің қызы­ғын негізінен ауылдағы ағайын көріп отыр. Осының нәтижесінде  1 138 жаңа жұмыс орны ашылған. Ал 2025 жылы 5,5 млрд теңге қар­жы бөлініп, 816,6 млн теңгеге 74 несие берілген. Биыл  134 жаңа жұ­мыс орны ашылған. 

Партияның алға қойған мақ­саты айқын. Сондықтан да әр күн, әр жоспар тыңғылықты қа­ра­лады. Ол туралы бізге облыс­тық филиалдың атқарушы хат­шысы Азамат Сафималиев былай дейді.

«AMANAT» халықтық партия болған соң ел тағдыры үшін жау­апкершілік жүгін арқалап, өзінің құрылған күнінен бастап адам­ның, қоғамның және мемлекет­тің дамуына жасалатын жағдайды жақсарту мақсатымен экономика мен саясатта ауқымды рефор­маларды тұрақты түрде жүзеге асыруда. Осы тұрғыдан «AMANAT» партиясы халықтың әлеуметтік жағдайын жақсарту жолындағы барлық игі бастамаға ұйытқы болып, ортақ мүдде жол­ында күш біріктіріп, елдің көр­кейіп гүлденуіне үлес қосып кел­еді. Қоғамға пайдалы көпте­ген бастама мен тындырымды істің басы-қасында болып келе­міз. Кент және елді мекен тұр­ғын­дарымен жүйелі түрде кез­де­сіп, ұдайы қоғамдық қабылдау ұйым­дастырып отыра­мыз. Әсі­ре­се, қарапайым халықпен жеке қабыл­дау өткізіп, келелі мәселе­лерді кеңінен қозғап, шешу жол­дарын қарастырамыз. Мұнда партия халықты ашық форматта қабыл­дайды және бірінші кезек­те тұр­ғындардың өтініші мен құқық­тары басты назарға алына­ды, – деді ол.

Бас партияның БҚО-дағы фи­лиалы 2023 жылдан бері сай­лауалды бағдарламаны жүзеге асыру аясында келесідей нәти­же­лерге қол жеткізген. 

Атап айтсақ, облысқа инвес­торлар көптеп тартылып, нәти­жесінде 41 инвестициялық жоба іске қосылып, 1 473 жаңа жұмыс орны ашылып отыр. Тек БҚО-ның өзінде  25 мектеп, 78 мек­теп­ке дейінгі ұйым, 50 медици­на­лық ұйым ашылды. 

Дегенмен алда әлі де талай атқарылуы тиіс жұмыс бар. Оны атқару үшін бюджеттен қаражат қажет дейді мамандар. 

Атап айтсақ, алда шешілмей тұрған экологиялық пробле­ма­лар, облыс тұрғындарының өмір сапасын арттыру, кіріс көзін есе­леу, медициналық қызметтің сапасын көтеру мәселері бойын­ша әлі де түсетін арыз шағымдар бар. Партия жееткшілігі алдағы уақытта бұл жұмыстарды да ретке келтіретінін жеткізіп отыр.

Жанат ҚАЙЫРҒОЖИНА,

Батыс Қазақстан облысы