Айтылды орындалды : Аймағамбетов көптің көкейіндегі күрмеуді шешіп берді (ФОТО)

Мәжіліс депутаты Асхат Аймағамбетов Қарағанды қаласындағы онкодиспансер құрылысына қатысты жағымды жаңалықты бөлісті, деп хабарлайды Arasha.kz.

Депутаттың айтуынша, Арнайы мемлекеттік қордан 6,2 млрд теңге бөлініп, Қарағандыдағы онкодиспансердің операциялық және реанимациялық блогының құрылысын аяқтау мәселесі шешімін тапқан.

"Айтылды – орындалды. Біз бұған дейін Қаржы министрлігіне осы қаражатты бөлу туралы ресми өтініш жолдаған едік. Енді сол еңбектің нақты нәтижесін көріп отырмыз – шешім қабылданды, қаржыландыру мақұлданды", – деді Аймағамбетов.

Ол бұған дейін онкоорталыққа арнайы барып, ондағы жағдаймен танысқанын да атап өтті.

"Дәрігерлер ескі ғимаратта, шектеулі мүмкіндіктермен жұмыс істей жүріп, күн сайын адам өмірі үшін күресіп келеді", – деді депутат.

Жаңа жобаның аясында заманауи операциялық және реанимациялық палаталар салынып, жоғары технологиялы медициналық жабдықтар орнатылады. Бұл – өңір медицинасының дамуына серпін беріп, мыңдаған науқасқа үміт сыйлайтын маңызды нысан болмақ.

"Мұндай шешімдер тек медицинаға емес, сенім мен адамдық қадір-қасиетке, ең бастысы – үмітке салынған инвестиция", – деп түйіндеді Асхат Аймағамбетов.