Көптің алғысына бөленген дәрігер

Egemen.KZ парақшасынан алынған деректерге сүйене отырып, Qazaq24.com хабарлама жасады..

Қарбалас тіршілікте азаматтық ұстанымына, кәсіби міндетіне дақ түсірмей жүрген жақсы-жайсаңдармен жиі ұшырасамыз. Халықтың батасын алған осындай азаматтардың қатарына жоғары санаттағы хирург-уролог, медицина ғылымдарының докторы Сүният Құсымжановты қоссақ әбден болады. Ол – «Академик Б.Жарбосынов атындағы урология ғылыми орталығы» АҚ бөлім меңгерушісі, профессор, «Алтын қандауыр» сыйлығының лауреаты.

Сүният Мырзекенұлы – Семей қаласының тумасы. Алматы мемлекеттік медицина институтын жалпы медицина мамандығы бойынша тәмамдаған. Докторлық диссертациясын сәтті қорғап, ғылымда да жетістікке қол жеткізді. Урология ғылыми орталығының реконструктивті-пластикалық урология бөлімшесін 35 жылдан бері абыроймен басқарып келеді. Барар жер, басар тауы қалмай, жалғыз үмітін арқалап келген талай науқасты аяққа тұрғызды, сауығуына себепші болды. Орталық еліміздегі жетекші ұйымдардың бірі саналады. Жыл сайын 4 мыңнан астам науқасқа жоғары технологиялық-медициналық көмек көрсетеді. Пациенттердің шамамен жартысына жуығы Алматы қаласының тұрғыны болса, өзге облыстардан келетіндердің үлесі де сол шамада.

Сүният Мырзекенұлы осы орталықта жүріп, 10 мыңнан аса операция жасады. Орталықтың мықтап қалыптасуына, дамып, өркендеуіне үлес қосты. Отандық урологияда лапароскопия, эндобейнехирургия сынды жаңа тәсілді енгізуге бастамашы болды. Есесіне, операцияның осы түрі дәстүрлі, ашық, жарақатқа байланысты операцияларды, ең күрделі саналатын реконструктивті, пластикалық операцияларды алмастырды. Бұл дегеніңіз – урологияда бұрын күрделі саналған бірнеше операцияны енді тілік жасамай емдеуге болады деген сөз. Ол гидронефроз, операциядан кейінгі стриктуралар, ятрогенді, операция кезіндегі зәр шығару жолдарының жарақаттары сынды басқа да күрделі патологияларға арналған бірнеше күрделі реконструктивті хирургиялық әдістерді әзірлеп, клиникалық тәжірибеге енгізді.

Профессор С.Құсымжанов өзінің жылдар бойы жиған тәжірибесін жастарға үйретуді кәсіби міндеті әрі ағалық ізеті санайды. Содан болар, бір операциядан екіншісіне кіріп, тұтас бөлімнің жұмысына жауапты болса да, жоғары білікті урологтерді даярлауға үлес қосып келеді. Ол – Еуропалық урологтер қауымдастығының, Халықаралық урологтер қоғамының, Ресей урология ғылыми қоғамының мүшесі. Есімі клиникалық пәндер жөніндегі медицина сарапшыларының халықаралық тізіліміне енген. С.Құсымжанов әзірлеген хирургиялық араласулар мен лапароскопиялық емшаралар еліміздің 27 патентімен, 4 халықаралық патентпен расталған.

Мамандығына адал дәрігердің медицинадағы осындай бастамаларына, қажырлы еңбегіне сай алған атақ, марапаты да жетеді. Дегенмен, С.Құсымжановтың өзі ең үлкен марапат халықтың батасы, алғысы, ықыласы екенін үнемі айтып отырады. Елге сыйлы дәрігер отандық медицинаның көкжиегін кеңейтуден әлі күнге қол үзген жоқ. Осының барлығын саралап, қорыта келіп, Сүният Құсымжановты «Қазақстанның еңбек сіңірген қайраткері» құрметті атағына әбден лайық деп санаймыз.

Мұратбек МҰХАМБЕКОВ,

экономика ғылымдарының докторы, профессор

Соңғы жаңалықтар