Айына екі рет егеді : АИТВ ның алдын алатын жаңа препарат шықты

Англия мен Уэльс тұрғындарына жақын арада АИТВ жұқтырудың алдын алуға арналған әрі ұзақ әсер ететін инъекциялар қолжетімді болмақ, – деп хабарлайды Aikyn.kz сайты euronews.com сайтына сілтеме жасап.

Ұлттық денсаулық сақтау және клиникалық жетілдіру институты (NICE) жаңа дәрілер бойынша ұсыныстар айтты. Енді бұл екпені АИТВ жұқтыру қаупі жоғары, бірақ дәріні "таблетка" түрінде қабылдай алмайтын ересектер мен жастарға салу қарастырылған.

Каботегравир деп аталатын осы бір препарат әр екі ай сайын егіледі.

Бұл – алдын ала дайындалған профилактикалық терапияның (PrEP) түрі. Ол вирустың ағзада көбеюін және таралуын тоқтату арқылы жұмыс істейді. Ересектер мен жасөспірімдерде АИТВ жұқтыру қаупін төмендетеді. 2024 жылы Ұлыбританияның денсаулық сақтау агенттігінің (UKHSA) деректеріне сәйкес, Англияда 111 000-нан астам адам жыныстық денсаулық клиникалары арқылы PrEP бағдарламасын пайдаланған. NICE бағалауынша, жыл сайын шамамен 1000 адам Англиядағы Ұлттық денсаулық сақтау қызметі (NHS) арқылы каботегравир қолданады деп пайымдап отыр. Препарат алдағы айларда қолжетімді болады.

NICE дәрілік бағалау директоры Хелен Найт:

“Бүгінгі каботегравирге қатысты ұсыныс – маңызды кезең. Өйткені бұл – пациенттерге арналған АИТВ профилактикасының алғашқы инъекциялық түрі”, – деді.

АИТВ-ның алдын алуға арналған басқа препараттар да дайындалып жатыр

Каботегравир басқа бір препараттан (ленакопавирден) ерекшеленеді. Ленакопавир ірі медициналық серпіліс ретінде танылды, себебі клиникалық сынақтарда жоғары тиімділік көрсетті әрі оны жылына бар болғаны екі рет енгізу жеткілікті.

Еуропалық Одақ пен АҚШ реттеушілері ленакопавирді осы жылдың басында мақұлдады. Егер өндіруші Gilead компаниясы мақұлдау алу үшін өтініш берсе, бұл Ұлыбритания билігінің шешімін жеделдетуі мүмкін. 

Бай елдерде ленакопавирдің бір жылдық курсының құны 28 000 АҚШ долларынан (шамамен 24 000 еуро) асады деп хабарлайды Unitaid медициналық ұйымы.

Өткен айда Unitaid ұйымы 2027 жылдан бастап табысы төмен 120 елде ленакопавирдің арзандатылған, генерикалық нұсқасын қолжетімді етуді жоспарлап отырғанын жариялады.