Букмекерде бәс тігіп, алимент төлемеген: Атырау прокурорлары 200 млн теңге берешекті қайтарды

Атырау облысының прокуратурасы алимент бойынша берешекті қайтару шараларын күшейтті. Қабылданған шаралардың нәтижесінде жыл басынан бері 1400-ден астам баланың пайдасына 200 миллион теңгеден астам қарыз өндірілді.

Прокуратураның мәліметі бойынша, жыл басынан бері перзентіне қаржылай көмектесуден жалтарған 138 борышкер әкімшілік жауапқа тартылды. Ал 16 адамға қатысты іс қылмыстық қудалау деңгейіне дейін жеткен. Тексеру нәтижесі көрсеткендей, олардың арасында такси қызметін атқарғандар, букмекерлік кеңселерде бәс тіккендер және мүлкі бола тұра қарызын төлеуден қашқандар бар.

Сонымен қатар қадағалаушы орган сот шешімдерін орындауға міндетті мамандардың да жауапкершілігін қарады. Өз қызметтік міндетін тиісінше орындамағаны үшін 90 сот орындаушысы тәртіптік жауапқа тартылды.

Атырау облысының прокуратурасы ата-ананың қайда тұратынына қарамастан, алимент төлеу міндеті жойылмайтынын ескертеді. Ғимарат өкілдері кәмелетке толмағандардың құқықтары мен мүдделерін қорғау және берешекті қайтару бағытындағы жұмыстардың әрі қарай да жалғасатынын хабарлады.

Кеше, 18:13