Әкім Индербор халқының алдында қалай есеп берді

Индер ауданы әкімінің есебіне аз ғана тұрғын қатысты. Ал келгендер қаржы тапшылығы мен мерзімдердің кейінге қалдырылуы туралы үйреншікті сөздерді және 2026 жылға бағытталған жаңа уәделерді тыңдап қайтты.

Индер ауданы әкімі Серік Нысанбаев Индербор кенті тұрғындары алдында есеп берді. Неге екені белгісіз бұл жиын тұрғындарды аса қызықтырмаса керек-ті, халық аз жиналып, мәдениет үйінің кең залының жартысынан көбі бос қалды. Жиын бар болғаны бір сағатқа қана созылды. 

Аудан әкімі әдеттегідей тұрғындар алдында биылғы жылы атқарылған жұмыстар бойынша есеп берді, айтуынша барлық сала бойынша ілгерілеушілік бар. Ал алда атқарылар жұмыстар ауқымды болып шықты, олар:апатты үйлердің жайы, кәріз жүйесі, "Жеңіс" саябағын күрделі жөндеуден өткізу, жаяу жүргінші жолы, стадион, тағы басқа көптеген мәселелер бар болып, 2026 жыл мен кейінге жылдардың үлесінде қалған. Әкім баяндамасы тыңдалғаннан кейін сұрақ-жауапқа көшті. Айта кету керек, жарыссөзге адам шықпады. 

-"Болашақ" ықшам аудандағы жол жұмысы 2026 жылға қалды деп отырсыз, Сіз осы сөзді бұрын да айтқансыз. 2025 жылы жол жұмысы қарқынды жүреді деп, жолдар жартылай жасалған, біздің үшінші көшеге шебен де төселмей қалды, тағы да балшықпен арпалысу қалды. Осы жерде тұрғаныма 15 жылдай болды, көшіп кетейін десем үйреніп қалған жеріміз. Ең болмаса бір слой болса да жол төсесін,  мектеп құрылысы да тұралап тұр,-деді Тынышқал есімді тұрғын. 

Әкім тұрғын сөзіне шамданып қалғандай, бірақ "Мен және әріптестерім бітіреміз, жоспарлаймыз деп айтамыз, себебі бәрі қаржыға байланысты" деп ақталды. 

С. Нысанбаев "Болашақтағы" жол жұмысын жасаған мердігердің 400 млн теңге артық жұмыс жасағанын атап өтті, бірақ аудан облыстан қаржы ала алмауына байланысты жол жұмысы өз мәресіне жетпеген. Ауданда дәрігердің жетіспеуіне байланысты сұрақ туындады, лорға қаралу үшін 180 км қашықтағы облыс орталығы Атырау қаласына бару керек.

Дәрігердің қат екенін әкім де жасырмады, егер маман келсе көтерме ақы мен қызметтік үй берілмекші. Сөз арасында әкім оңтайландыру орталығының ғимараты 2026 жылы бітетінін мәлімдеді. 4 жылдан бері жөндеуі бітпей тұрған ғимарат келесі жылы пайдалануға беріледі дегенге күмән бар. Өйткені мердігер мекеме  "SCS Инжиниринг" ЖШС жосықсыз қатысушы деп табылған. 

Кенттегі 80 пәтерлік үй салушы банкрот болып, жұмысы бірнеше жылдан тоқтап тұр. 

Жалпы кентте проблемалық мәселелер баршылық. Жергілікті тұрғындар жауыр болған жауаптардан ығыр болғаны соншама, жабулы қазан күйіне қалдырғандай...

Ләззат ҚАРАЖАНОВА

Бүгін, 17:26