Димаш Мысырдағы концертінің алдында сұхбат берді

30 қарашада Гиза қаласында өтетін «The Pyramids Echo» фестивалі аясында Димаш Құдайберген екі сағаттық жеке концертін қояды. Мысырдағы жаңа елде, жаңа континентте өнер көрсетпес бұрын, қазақстандық өнерпаз фестиваль ұйымдастырушыларының сұрақтарына жауап берді, деп хабарлайды Egemen.kz.

– Тарих пен бүгінгі күн, Қазақстан мен Мысыр арасындағы байланысты сезінесіз бе?

– Мен Қазақстаннан, Ақтөбе қаласынанмын. Мені тек ата-анам ғана емес, ата-әжем де тәрбиеледі. Бала кезімізден мен, қарындасым, інім үшеуміз халқымыздың дәстүрлері жайлы көптеген әңгімелер тыңдап өстік. Үлкендер бізге мақал-мәтелдердің мәнін түсіндіріп, өткеннің даналығын ән-күй арқылы – домбыра, қобыз және ұлттық аспаптарда орындалатын дәстүрлі әндер мен күйлер арқылы үйретті.

Біздің еліміз де Мысыр сияқты көне тарихқа ие, бірақ заманауи әлеммен бірге ілгерілеп келеді. Сондықтан, иә, мен екі халық арасында ерекше рухани байланыс барын сезінемін. Өткеніміз болмаса, бүгініміз де болмас еді.

– Пирамидалар туралы алғаш рет қашан естідіңіз?

– Алғаш рет пе? Әрине, өте ертеде – бәлкім, өткен ғасырда шығар! (күлді) Нақты есімде жоқ, бірақ Пирамидаларды алғаш мультфильмдер мен балалар кітаптарынан көрдім деп ойлаймын. Кейінірек мектепте Ежелгі Мысыр тарихын оқыдық.

– Пирамидалар мен ежелгі Мысыр өркениеті Сіз үшін нені білдіреді?

– Олар мен үшін мәдениет пен даналықтың нышаны. Олар Мысыр тарихының қаншалықты терең әрі бай екенін көрсетеді. Осындай тамаша мұраны сақтап, әлеммен бөлісіп отырғандарыңызға үлкен құрметпен қараймын.

– Бұл Сіздің Мысырдағы алғашқы концертіңіз бе? Турист ретінде осы елге бұрын-соңды келіп пе едіңіз?

– Иә, Мысырға алғаш рет келуім. Өкінішке қарай, бұған дейін турист ретінде де болмаған екенмін. Сондықтан дәл қазір осында болып, осы фестивальде еліміздің мәдениетін таныстырып отырғаныма өте қуаныштымын.

– Сіздің ойыңызша, музыка халықтар мен мәдениеттерді жақындастыруда қандай рөл атқарады? Өнер мен мәдениет әлемдегі үйлесімділікті сақтауға көмектеседі деп ойлайсыз ба?

– Әлемнің кез келген жеріндегі – Қазақстандағы, Еуропадағы немесе Америкадағы болсын концерттерімнің біріне келсеңіз, әртүрлі елдерден жиналған адамдардың бірге отырғанын көресіз. Олар түрлі тілдерде ән айтады: қытайлық жанкүйерлер – орысша, испандықтар – французша, ал барлығы бірге қазақша ән шырқап жатқанын көресіз. Менің ғажайып Dears жанкүйерлерім – музыканың сөзсіз-ақ қаншама жүректерді біріктіре алатынының ең жақсы дәлелі.

– «Пирамидалар жаңғырығы» фестивалі жөніндегі әсеріңіз қандай? Бұл фестивальдің алғашқы шығарылымына қатысу Сізге қандай әсер сыйлайды?

– Дәл осы жаңа халықаралық жобаның бір бөлігі болғаныма өте қуаныштымын. Бұл алғашқы фестиваль осынау көне тарихқа толы әсем өлкеде өтетін көптеген шаралардың бастауы болады деп үміттенемін.

– Пирамидалар жанындағы концерттеріңізді асыға күтіп отырған мысырлық жанкүйерлеріңізге және Мысырда тұратын қазақ диаспорасына айтарыңыз бар ма?

– Мұнда өмір сүріп жатқан барлық қазақтарға және Қазақстан мәдениетіне қызығушылық танытатын, алыстағы елден келген барлық жанкүйерлеріме ең жылы сәлемімді жолдаймын. Маған жаңа континентте өз Отанымды таныстыру — зор мәртебе әрі үлкен қуаныш. Қолдауларыңыз бен сүйіспеншіліктеріңіз үшін алғыс айтамын.

Билеттерді Tazkarti Events платформасынан сатып алуға болады.