Әкім тойда бұрынғы әріптесімен не үшін төбелескенін айтты

Павлодар облысында этика кеңесі ауыл әкіміне жұмыс уақытынан тыс ветеринария қызметкерімен болған жанжал үшін қатаң сөгіс жариялауды ұсынды. Әкім кешірім сұрады, деп хабарлайды Arasha.kz.

Ауыл әкімдігі басшысы қарсыласынан кешірім сұрады, деп жазды Pavlodarnews.kz.

Қоянды ауылдық округінің әкімі Ержан Оразалимов пен ветеринария қызметкері арасындағы оқиға туралы ақпарат әлеуметтік желілерде тараған боалтын. Белгілі болғандай, жанжал кешкі уақытта, жұмыс уақытынан тыс кезде болған.

Ержан Оразалимов бұған дейін 12 жыл бойы ветеринария қызметінде еңбек еткен және жәбірленушімен жақсы қарым-қатынаста болғанын айтты. Полиция оқиғаның тұрмыстық сипатта болғанын және қатысушылардың кәсіби қызметіне қатысы жоқ екенін хабарлады. Тараптар татуласқанымен, бұл жағдай облыстық этика кеңесінде қаралды.

Ветеринария қызметкері әкімнен екі соққы алған, соның салдарынан миы шайқалып, жабық бас-ми жарақатын және бет сүйегінің жарақатын алған.

– Қыркүйектің соңындағы сенбі күні бауырымның қызын туған күнімен құттықтауға барған едім. Сол жиында ветеринария қызметінің маманы Жақсыбай Жақсылықов та болды. Арамызда дау туындап қалды. Оның себебі – алкоголь емес, менің жеке өміріме қатысты мәселе еді. Сол сәтте ашуға беріліп, дөрекілік таныттым. Кейін Жақсыбай Жақсылықовтан кешірім сұрадым,– деді Ержан Уразалимов.  

Әкімнің айтуынша, тараптардың ешқайсысы шағым түсірмегендіктен, құқық қорғау органдары іс қозғаған жоқ.

Ол сондай-ақ қоғамдық ортадан да кешірім сұрады.

Екібастұз әкімі Аян Бейсекин Ержан Оразалимовқа оң мінездеме беріп, қала әкімі аппаратының тәртіптік кеңесі тексеру жүргізгенін хабарлады.

– Жанжал жұмыс уақытынан тыс болғанымен, бұл мемлекеттік қызметшіні жауапкершіліктен босатпайды. Әкіммен профилактикалық әңгіме өткізілді, – деді Аян Бейсекин. 

Этика кеңесі бірауыздан Екібастұз әкіміне Қоянды ауылдық округі әкіміне қатаң сөгіс түрінде тәртіптік жаза қолдануды ұсыну жөнінде шешім қабылдады.

Ержан Оразалимов ауыл әкімінің қызметіне 2024 жылдың ақпан айында кіріскен.