Алатауға 1,8 трлн теңге инвестиция тарту жоспарланды

Мәжіліс пен Сенаттың бірлескен отырысында «Алатау қаласының ерекше мәртебесі туралы» заң жобасы қаралуда.
Жиында Қазақстан Премьер-Министрінің орынбасары Қанат Бозымбаев жаңа қаланың даму ерекшеліктері мен жоспарларын таныстырды.

Вице-премьердің айтуынша, үкімет заң жобасын әзірлеу барысында әлемдегі ерекше мәртебеге ие қалалардың тәжірибесін зерттеген. Алайда халықаралық статистика мұндай жобалардың тәуекелі жоғары екенін көрсетеді. Ұқсас бастамалардың шамамен 60 пайызы сәтсіз аяқталған.

Сәтсіздіктің негізгі себептері ретінде құқықтық және салықтық дербестіктің жеткіліксіздігі, бюрократия, инфрақұрылымға қаржының аз бөлінуі, сот жүйесінің әлсіздігі және инвесторлар үшін кепілдіктердің болмауы аталды. Соған қарамастан, табысты үлгілер де бар. Олардың қатарында Сингапур, Дубай, Доха және Қытайдағы Хайнань провинциясы көрсетілді.

Қанат Бозымбаевтың сөзінше, мұндай жобалардың табысты болуы тек арнайы мәртебеге ғана емес, тиімді институционалдық ортаға байланысты. Мысалы, Қытайдағы Шэньчжэнь мен Хайнань тәжірибесінде жергілікті билікке кең өкілеттік беріліп, шешім қабылдау процесі жеделдетілген.

Алатау қаласында инвесторлар үшін қолайлы жағдай жасау басты басымдықтардың бірі болмақ. Бұл үшін заңнаманың тұрақтылығына кепілдік беріліп, салықтық жеңілдіктер мен түрлі преференциялар ұсынылады.

Қазіргі таңда жалпы құны 1,8 трлн теңгені құрайтын 44 инвестициялық жоба пулы қалыптастырылған. Бұл жобалар шамамен 30 мың жаңа жұмыс орнын ашуға мүмкіндік береді.

Үкіметтің жоспарынша, Алатау болашақта ғылым, туризм, медицина және инновация салалары дамыған ірі орталықтардың біріне айналуы тиіс.