Ұзақмерзімді инвестиция тарту басымдығы

Премьер-министр Олжас Бектенов жаһандық инвести­циялар жөніндегі VIII қазақстандық дөңгелек үстелге (KGIR-2025) қатысты. Форумға 50-ден астам елден 1 мыңнан астам қатысушы, соның ішінде өнеркәсіп, энергетика, АӨК, қаржы, фармацевтика, консалтинг, басқа да салалардағы компаниялардың басшылығы жиналды.

Олжас Бектенов өз сө­зінде Мемлекет басшысы Қасым-Жомарт Тоқаев халық­қа Жолдауында жаңа инвести­циялық циклді іске қосу қажет­тігін атап көрсеткенін баса айтты. Басты міндет – мемлекет тек бизнесті сүйемелдеп қана қоймай, жаңа жобаларды құру­ға, іске қосуға белсенді қатыса­тын үлгіге көшу арқылы белсен­ді инвестициялық саясатты жүзеге асыру.

Үкімет ұлттық экономика­ны трансформациялау бойын­ша жүйелі жұмыс жүргізіп отыр. Биылғы 9 айда еліміздегі ІЖӨ кө­лемі 6,3%-ға өсті. Негізгі капиталға салынған инвести­ция көлемі 13,5%-ға артып, шама­мен 13,8 трлн теңгеге жетті. Жал­пы, Қазақстанның инвестиция­лық деңгейін әлемнің жетек­ші рейтингтік агенттіктері растады. Атап айтқанда, «Moody’s» еліміздің ұзақмерзімді рейтин­гін «Тұрақты» деген болжаммен тәуелсіз Қазақстан тарихын­дағы ең үздік көрсеткішке дейін көтерді.

Стратегиялық маңызы бар Транс­каспий халықаралық көлік бағыты инвестиция үшін келе­шегі зор аймақ ретінде айқындалды. ТХКБ бойынша ірі инфрақұрылымдық бірқатар жоба, соның ішінде шетелдік капитал мен халықаралық қаржы институттарының қатысуымен жүзеге асырылып жатыр.

Мемлекет басшысының ауқым­ды цифрландыру, жасанды интеллект технологияларын енгізу жөніндегі тапсырмасын жүзеге асыруға ерекше назар аударылды. Озық шешімдерді енгізуге және стартаптарды одан әрі жеделдетуге бағытталған «Alem.ai» халықаралық ЖИ орта­лығының ашылуы цифр­лық клас­терді нығайтуға ықпал етеді.

«Астана» халықаралық қар­­­жы орталығында бизнесті жүр­гізу үшін бірегей жағдай ұсынылады. АХҚО базасында ағыл­шын құқығы юрисдик­ция­сы заңды рәсімдердің ашықты­ғына кепілдік береді. Сондай-ақ Орталық «жасыл», исламдық және инновациялық қаржы құ­ралдарын дамыту үшін сенімді серіктес ретінде қызмет етеді.

Сонымен қатар Олжас Бектенов дөңгелек үстелге қаты­су­шылармен бірқатар кездесу өткізді. Онда агроөнеркәсіп кешені, энергетика, комму­нал­дық секторлар және басқа да салалардағы ағымдағы және перспективалық жобалар аясын­да инвестициялық ынты­мақ­тастық бағыттары қаралды.

Еуропалық қайта құру және даму банкінің вице-прези­денті Маттео Патронемен банк­тің Қазақстан аумағында инфра­құрылымдық жобаларға қатысу мәселелері талқыланды. Сондай-ақ шағын және орта бизнесті дамыту бағыттарына назар аударылды.

Ресей, Беларусь, Кавказ және Орталық Азия аймағы бойынша «PepsiCo» компаниясының президенті Дэвид Манзинимен кездесу барысында Алматы облысында құрылысы ақталуға жақын тұрған зауыт жөніндегі жобаның іске асырылу барысы қаралды. Өңір әкімдіктеріне тиісті мемлекеттік органдармен бірлесіп, инвестициялық жобаны қажетті инфрақұрылымдық шешімдермен қамтамасыз етуге одан әрі жәрдемдесу тапсырылды.

«Fufeng Group» директорлар кеңесінің төрағасы Ли Сюэчунмен Жамбыл облысында жүгеріні терең өңдеу бойынша тігінен интеграцияланған өнеркәсіптік парк жобасын жүзеге асыруға көңіл бөлінді. Өндіріс отандық шикізатқа негізделетін болады. Инвестор алдағы өндірісті іске қосу үшін «жылдам дәліз» тетігі шеңберінде қолайлы бизнес-ортаны және жасалған жағдайларды оң бағалады.

Кездесулердің қорытындысы бойынша Олжас Бектенов ел Үкіметі инвесторларға жан-жақ­ты қолдау көрсетіп және биз­нес-жобаларды толық сүйе­мел­деуге баса назар аудара отырып, қолайлы инвестициялық ахуал­ды қалыптастыруды жалғас­­ты­ратынын атап өтті. Жаңа өн­дірістерді іске қосу елдің өнер­кәсіптік және экспорттық әле­уетін нығайту, сондай-ақ жаңа жұ­мыс орындарын ашу үшін стра­­тегиялық маңызға ие.