Ауылға жеке инвестиция тарту қажет Президент

Ауылға әркімнің бүйрегі бұрады. Әркім аз да болса ауылына үлес қосқысы келеді. Бірақ оны қалай жүзеге асырамыз? Ауылды қалай дамытсақ болады?

Мемлекет басшысы да ауылды өркендетуге жеке инвестицияны көптеп тартуды тапсырды. Бұл орайда туған жерге туын тігуге дайын азаматтармен жергілікті билік бірлесе жұмыс істеуі керек, әрине.

Қазір елдегі барлық ауыл әкімін халық сайлады. Бұл да билікпен халық арасында ашық диалогтың болуына сеп. Мұның бәрі айналып келгенде ауылды дамытудың қамы.

Елде агроөнеркәсіп кешенін дамытуға қатысты 200-ден астам инвестициялық жоба жасақталды. Оның жалпы құны 4 трлн теңге. Мемлекет басшысы: «бұл жобаларды жүзеге асыруға әкімдіктер де, министрлік те белсенді араласуы керек», – деді. Ауылды дамытуға жеке инвесторларды тартуды да міндеттеді.

Қасым-Жомарт Тоқаев, Қазақстан Республикасының Президенті:

- Жалпы ауылға жеке инвестиция тарту өте маңызды. Бұл жұмысқа бизнес өкілдері белсене атсалысуы керек. Табысқа жеткен әрбір кәсіпкер өз ауыл-аймағының өркендеуіне үлес қосып, қаржы салса, еліміздегі көптеген елді мекен көркейе түсері анық.

Ауыл әкімдерінің форумына қатысу үшін БҚО Ақжайық ауданындағы Базаршолан ауылдық округінің әкімі Астанаға келді. Ол туған жерінің жанашыры.

Әкім болғалы елді мекенге интернет тартты. Жергілікті мектеп күрделі жөндеуден өтті. Көшелерге жарық берілді. Үйлер мен шағын емдеу мекемесі салынды. Шаруа қожақтарының саны артты. Қазір ауылдағы кен орны зерттеліп жатыр.

Мұрат Жұмашов, БҚО Ақжайық ауданы Базаршолан ауылдық округінің әкімі:

- Инвестиция енді біртіндеп жұмыстанамыз ғой. Өзімнің Базаршолан ауылдық округінде Сатимолла деген кен орны бар. Калий өндіреді. Сол енді болашақта үлкен, Қазақстандағы ірі жобалардың бірі болады. Ол біртіндеп жүзеге асып жатыр. Германиядан инвесторлар тартылып жатыр. Болашақта үлкен өзгерістер болады. Өздерінің әлеуметтік көмектерін, экономикалық көмектерін береді деген сенімдемін. Жеке кәсіпкерлермен де жұмыстануымыз керек.

«Ауылдан адам кеткенімен, адамнан ауыл кетпейді». Бұл рас. Қаншалықты қалаға сіңуге тырыссаң да, жусан иісі аңқыған атамекеніңді аңсап тұрасың. «Сол себепті ауыл әкімдері халқының кемімеуіне мүдделі болу керек», – дейді мамандар. Ал мемлекет тарапынан «Ауыл аманаты», «Ауыл – ел бесігі» сияқты бағдарламалар жемісті жүзеге асып келеді.

Бекзат Алтынбеков, «AMANAT» партиясы Қарағанды облыстық филиалының төрағасы:

- Ауыл әкімі ауылдағы әр азамат сол елінде дұрыс жұмыс жасап, жұмыс көздерін ұйымдастыратын болса, табыс көзін арттыратын болса, қалаға көшкен азаматтар қайтадан ауылға көшуге мүдделі болады деп есептеймін. Сондықтан біз қазір көптеген инвестицияларды ауылға әкелуге мүдделіміз деп есептеймін. Сондықтан әкімдер де осы мақсатта жұмыс жасауы керек.

Урбандалу үдерісі елдегі ауыл санын азайтуы мүмкін. Бірақ, бір тәуірі, жергілікті халық саны азаймайды. Яғни елдің бәрі бірдей қалға көшіп жатқан жоқ. Өзге ауылдарда тіршілік жанданған. Мұның бір себебі Үкімет ауылға барынша көңіл бөліп келеді. Кейінгі 5 жылда тиісті стратегиялық және бағдарламалық құжаттар қабылданды. Соның маңыздысы «ҚР ауылдық аумақтарын дамытудың 2023–2027 жылдарға арналған тұжырымдамасы». Ол ауыл тұрғындарының өмір сүру сапасын жақсартуды, әлеуметтік және инженерлік инфрақұрылымды дамытуды, сондай-ақ кәсіпкерлікке дем беріп, жергілікті өзін-өзі басқаруды жетілдіруді көздейді. Демек ауыл әкімдеріне артылған жүк жеңіл емес.

Авторы: Мерей Мұратханқызы