Алаяқтық болған жоқ : Атырау тұрғыны жалған стоматологиялар ісі бойынша президентке жүгінді

Атырау тұрғыны Жайық Иманбаевтың айтуынша, оның бауырлары Ғаббас Иманбаев пен Берік Абдолла Қаржылық мониторинг агенттігі (ҚМА) қозғаған қылмыстық іс бойынша айыпталып отыр.

Тергеу нұсқасына сәйкес, олар басқарған стоматологиялық клиника азаматтардың БЖЗҚ-дан алған қаражатын мақсатсыз жұмсауға қатысы бар деген күдікке ілінді.

Алайда Имамбаев бұл пікірмен келіспейді. Ол өз үндеуінде айыптаулар түсінбеушілікке негізделгенін және заңдық тұрғыдан дәлелі жоқ екенін айтады.

Оның сөзінше: «БЖЗҚ – бұл халықтың еңбегімен тапқан ақшасы. Біз жалақымыздың 10 пайызын ай сайын аударып отырамыз. Мемлекет осы жинақтың бір бөлігін пайдалануға мүмкіндік берді – халық сол құқығын пайдаланды. Көпшілік бұл ақшаны ипотека, несие, емделуге жұмсады. Бұл қалай қылмыс болуы мүмкін? БЖЗҚ-дан қаражат алу үшін бірнеше кезеңнен өту керек. Барлығы тіркеледі және тексеріледі. “Таныстықпен” жасау мүмкін емес. Сондықтан стоматологиялық клиниканы алаяқтыққа айыптау – қисынсыз».

Сонымен қатар, тергеу деректерінде кейбір клиникалар БЖЗҚ қаражатын «қолма-қол ақшаға шығарып беру» үшін 10–15 пайыз комиссия алып, жалған стоматологиялық қызмет рәсімдегені айтылған. ҚМА осыны қылмыстық іс қозғауға негіз еткен.

Имамбаев өз үндеуінде БЖЗҚ-ның шетелге салған инвестициясын да мысалға келтірді:

«БЖЗҚ 70 млрд теңгені Әзербайжанға аударғанда, ҚМА мен басқа органдар қайда болды? Неге іс қозғалмады? Енді қарапайым дәрігерлер мен кәсіпкерлерді болмаған қылмыс үшін айыптап отыр».

Анықтама

Әзербайжанға қатысты БЖЗҚ инвестициялары 

2022 жылы бұқаралық ақпарат құралдарында Қазақстанның Бірыңғай жинақтаушы зейнетақы қоры Әзербайжанның Халықаралық банкі (IBA) облигацияларына шамамен 70 млрд теңге салғаны хабарланды. Бұл мәмілеге Қор активтерін басқаратын Ұлттық банк қатысқан.

Кейін сарапшылар мен депутаттар бұл инвестициялардың сенімділігіне алаңдаушылық білдіріп, бұған дейін IBA-ның қарыздарын қайта құрылымдағанын еске салды.

БЖЗҚ бұл инвестициялар «активтерді әртараптандыру мақсатында» және заң талаптарына сай жүргізілгенін түсіндірді. Дегенмен, қоғамда бұл ақпарат үлкен пікірталас тудырды – көптеген азамат зейнетақы жинақтарының тәуекелі жоғары шетелдік активтерге салынуына қарсы болды.

Имамбаевтың айтуынша, оның бауырлары – көп жылдан бері халықтың игілігі үшін қызмет етіп келе жатқан дәрігерлер. Қазір олардың біреуі тергеу изоляторында, екіншісі іздеуде. Ер адамның сөзінше, қылмыстық іс отбасына моральдық соққы беріп, абыройларына нұқсан келтірді.

«Менің бауырларым ешкімді алдаған жоқ, ешкімге зиян келтірмеді. Олар тек жұмыс істеп, пациенттер қабылдады, адамдарға көмектесті. Заңды құқықты пайдаланғаны үшін адамды жазалауға болмайды. Егер мұндай істер жалғаса берсе, халықтың билікке деген сенімі түбегейлі жоғалады. Мемлекет қылмыс жоқ жерден кінә іздемей, өз азаматтарын қорғауы керек».

Айгүл МАНСУРОВА

Бүгін, 11:44