Албаниядағы жаппай тәртіпсіздіктер: наразылық білдірушілер үкімет ғимараттарына басып кіруде

Албания астанасы Тиранада наразылық білдірушілер мен полиция арасындағы қақтығыс үшінші күн қатарынан жалғасып жатыр. Бейсенбіде үкімет ғимараттарына зақым келген жаңа тәртіпсіздіктер аясында премьер-министр Эди Рама елдегі "хаосты" айыптады, деп хабарлайды Tengrinews.kz Euronews басылымына сілтеме жасап.

Бейсенбі күні наразылық білдіруші студенттер мен олардың жақтастары Экономика министрлігіне басып кіріп, ғимарат ішінде бүлік шығарды.

"Тирана көшелеріндегі зорлық-зомбылық пен мүлікті бүлдіруге ұласқан 10 сағаттық тәртіпсіздіктен кейін наразылық білдірушілер Экономика министрлігіне басып кірді. Демонстранттар ғимарат ішіне еніп, жиһаздар мен принтерлерді қоса алғанда, жабдықтарды сыртқа шығара бастады", - деп хабарлады Albanian daily news.

Сонымен қатар Орталық сайлау комиссиясының кеңсесі де қиратылды. Билік басындағы партия кеңсесінің маңында жағдай ушыға түсті. Полиция студенттерді тарату үшін көз жасаурататын газ қолданды. Жиналған топ полиция қызметкерлері мен ведомство ғимараттарына тас, пиротехника және "Молотов коктейльдерін" лақтырып, орталық көшелердегі витриналар мен дүңгіршектерді талқандады. 72 сағатқа созылған тәртіпсіздік кезінде 71 полиция қызметкері зардап шекті.

Студентер оқу ақысының қымбаттығына, оқу жағдайының нашарлығына және мамандық бойынша жұмыс орнының тапшылығына наразылық білдірген. Демонстранттар премьер-министр Эди Рамадан бейсенбінің ортасына дейін отставкаға кетуді талап етті, алайда ол бұл талаптан бас тартып, наразылық білдірушілерді көшедегі зорлық-зомбылықтары үшін айыптады.

"Біз бұл қиын сәттерді бірге еңсереміз, өйткені Албания өркендеуін жалғастырады және Еуропаға бағытталған жолынан таймайды", - деді Рама бейнеүндеуінде. Ол Албанияның ЕО-ға мүшелікке өтінімін меңзеп отыр, оны Еуропалық комиссия 2027 жылға қарай аяқтауды жоспарлап отыр.

Бейсенбі күні астана орталығындағы мыңдаған демонстранттарға жоғары сынып оқушылары қосылды. Олар "Рама, отставкаға кет!" деп ұрандатып, қаладағы көлік қозғалысын іс жүзінде тоқтатып тастады.

Жаңа қақтығыстар сәрсенбідегі тәртіпсіздіктерден кейін қайталанды. Денсаулық сақтау министрлігінің мәліметінше, ол күні наразылық білдірушілер үкімет ғимараттарына, банктерге және жеке бизнес нысандарына шабуыл жасап, салдарынан 89 адам, соның ішінде 61 полиция қызметкері зардап шеккен.

Бізді Google-дың негізгі дереккөздер тізіміне қосыңыз