Алдағы 10 жылда да сұранысқа ие, табысы жоғары мамандықтар анықталды

Екі жыл бұрын «Анкетолог» қоғамдық пікір институты 18 жастан асқан 2 мыңға жуық жұмыс істейтін ресейліктер арасында сауалнама жүргізіп, алдағы 10-20 жылда ең сұранысқа ие болатын қызмет салаларын анықтады, – деп хабарлайды Aikyn.kz сайты.

Әрине, бұл Ресейдегі жағдай, бірақ Қазақстанда да шамамен осындай үрдіс байқалады.

Сауалнамаға қатысқандардың 50%-ы бұл сала ретінде ақпараттық технологияларды атаған. Сонымен қатар, респонденттер әрқашан өзекті болып қалатын бағыттар ретінде робототехника, машина жасау, биотехнология, қауіпсіздік және күштік құрылымдарды атады. Зерттеу нәтижесінде қатысушылардың жартысынан көбі жаңа мамандық меңгеруді жоспарлағаны белгілі болды.

Басқа зерттеулерге сәйкес, жұмысшы мамандықтар өзектілігін жоғалтпайды: егер орта деңгейдегі бағдарламашыны жасанды интеллект қазірдің өзінде алмастыра алса, сантехниктің орнын басып, су жүйесіндегі ақауды түзететін адам әлі ұзақ жылдар бойы керек болады.

Дәрігерлер де алмастырылмайтын мамандықтар тізіміне енді. Медицина саласында технологиялар мен жасанды интеллект дамып жатқанына қарамастан, адам факторын толығымен жою мүмкін емес.

Төменде алдағы 10 жылда да тұрақты табыс әкелетін бес негізгі сала көрсетілген:

1. Машиналық оқыту маманы

Мұндай мамандар әртүрлі міндеттерді шешу үшін машиналық оқыту алгоритмдері мен модельдерін жасайды, сынайды және енгізеді. Бұл – деректерді талдау, болжам жасау, процестерді автоматтандыру және интеллектуалды жүйелер құру сияқты бағыттарды қамтиды. Яғни, олар жасанды интеллектке «есте сақтау» мен «талдау» қабілетін береді.
Мамандық Ресейде де, әлем бойынша да жоғары сұранысқа ие. Қазірдің өзінде бастапқы деңгейдегі мамандар айына 80 мың рубльден, тәжірибелі мамандар 200 мың рубльден жоғары табыс табады.

2. Медицина саласы

Медицина қызметкерлері – кіші персоналдан бастап, профессорларға дейін қазір де, болашақта да сұраныста болады. Олар аурулардың алдын алу, диагностика жасау және емдеумен айналысады, сондай-ақ науқастарға күтім көрсетеді. Бұл салада мемлекеттік те, жеке де секторда, ғылыми-зерттеу институттарында және медицина орталықтарында жұмыс істеуге мүмкіндік бар.

Келесі 10-20 жылда медицина мамандықтарындағы жұмыспен қамту деңгейі орташа көрсеткіштен әлдеқайда жылдам өседі деп болжанады. Бұл өмір сүру ұзақтығының артуы мен медицинаның дамуына байланысты.
Қазір Ресейде дәрігерлердің орташа айлық табысы 100 мың рубльден жоғары, орта буын қызметкерлері шамамен 50 мың рубльден, ал кіші персонал 45 мың рубльден жоғары алады.

3. Бағдарламалық қамтамасыз етуді әзірлейтіндер

Бағдарламашылар қосымшалар, іздеу жүйелері, сайттар немесе тұтас экожүйелер жасайды. Олар тек ІТ-салада ғана емес, қаржы, медицина, медиа, көлік, логистика және басқа да салаларда жұмыс істей алады.
Бастапқы деңгейдегі әзірлеушілер айына 80 мың рубльден, кәсіби мамандар 300 мыңнан, ал команда жетекшілері 400 мың рубльден жоғары табыс табады.

4. Психологтар

Психологтарды технологиямен ауыстыру әлі де мүмкін емес, себебі бұл мамандықтың негізі – эмпатия мен адаммен тікелей қарым-қатынас. Психологтар жеке тәжірибеде де, мемлекеттік және жеке ұйымдарда да жұмыс істей алады. Олардың білімі медицинада, білім беруде, бизнесте кеңінен қолданылады.

Бір консультацияның бағасы 1 мыңнан 15 мың рубльге дейін, ал айлық орташа табыс шамамен 150 мың рубльді құрайды.

5. Энергетика саласы

Энергетиктер электр және жылу энергиясын өндіру, тарату және пайдалану мәселелерімен айналысады. Соңғы жылдары технологтар, механиктер, электриктер мен гидроэнергетиктерге сұраныс артып келеді.
Болашақта жаңартылатын энергия көздері бойынша инженерлер де қажет болады – күн панельдерін, жел турбиналарын, геотермалдық жүйелерді және биомассаны өңдеу қондырғыларын жобалайтын мамандарға сұраныс өседі деп күтілуде.

Қазір Ресейде энергетиктердің орташа айлық жалақысы 80 мың рубльден жоғары, ал ірі қалаларда – 200 мың рубльден астам.