Александр Бублик: Ел намысын қорғау үлкен жауапкершілік

Александр Бублик бұл ойын медиа өкілдерімен өткен жабық форматтағы meet & greet кездесу барысында бөлісті.

Спортшының айтуынша, командалық турнирдегі негізгі қысым ел намысын қорғау жауапкершілігімен тікелей байланысты.

– Дэвис кубогында сен өзің үшін емес, ел үшін ойнайсың. Бұл маған оңай болмады. Нақты осы жауапкершілікке байланысты ішкі қысымды қатты сезінемін, – деді ол.

Оның айтуынша, қоғамдық сынға онша мән бермегенімен, ішкі жауапкершілік үнемі сезіледі.

– Сынға сабырмен қараймын, шыны керек, аса мән бермеймін. Бірақ ел үшін ойнаудың жауапкершілігін сезінемін, – деді теннисші.

Александр Бублик соңғы жылдары Дэвис кубогы аясындағы нәтижелері ATP турындағы жетістіктерімен салыстырғанда төмен екенін де жасырмады.

– Осы уақыт ішінде мен рейтингтің алғашқы ондығына ендім, ATP турнирлерінде бірнеше титул жеңіп алдым. Бірақ Дэвис кубогында жеңістерім болған жоқ. Бұл, әрине, белгілі бір деңгейде қиындық тудырады, – деп мойындады ол.

Соған қарамастан, теннисші ұлттық құрама сапында ойнауды өз міндеті санайтынын атап өтті.

– Менің келмей қоюыма да болатын еді. Бірақ бұл маған тән әрекет емес. Қазақстан үшін ойнауды өз борышым деп есептеймін, – деді Александр Бублик.

Спортшы мансаптық өсуі мен әлемдік рейтингтің үздік ондығына енуі туралы айтып, шешуші кезең ретінде бұрынғы «жайлы аймақтан» шығуды және мүмкін болатын құлдырауды қабылдауды атады.

– Рейтингтегі 30-40-орындар мен үшін ыңғайлы болды. Ол жерде қысым аз. Ал алғашқы жүздіктен шығып қалған кезде, нәтиже үшін күрессіз теннис ойнау қызық емес екенін түсіндім, – деді ол.

Оның айтуынша, өзгерістерге саналы дайындық пен жаттығу процесіне деген көзқарастың өзгеруі әсер еткен.

– Бұл сиқырлы таяқшаның бір сілтеуі емес. Қосымша жауапкершілік пайда болды, мен соны жаттығу кезінде игере алдым, – деп атап өтті спортшы.

Алдағы мақсаттары туралы сұраққа жауап берген Александр Бублик өзін алғашқы ондықтың ойыншысы деп атауға әлі ерте екенін жеткізді.

– Алғашқы ондыққа кіру – бір бөлек, сол жерде бірнеше жыл бойы тұрақтап қалу – мүлде басқа дүние. Сондықтан өзімді ТОП-10 ойыншысымын деп айта алмаймын, – деді ол.

Алдағы күндері Александр Бублик Қазақстан құрамасы сапында Монако командасына қарсы Дэвис кубогының матчтарына қатысады.

6-7 ақпан күндері Астанада ерлер ұлттық құрамасы аталған қарсыласқа қарсы ойын өткізеді.

Егер Қазақстан құрамасы жеңіске жетсе, команда Дэвис кубогының бірінші әлемдік тобына жолдама алады. Дэвис кубогы – ерлер арасындағы теннистен командалық әлем чемпионатына тең жарыс саналады.

Айта кетейік, бұған дейін Александр Бубликтің Australian Open турниріне қатысқаны хабарланған болатын.