Әлеуметтік маңызы бар азық түлік үш аптадан бері қымбаттамады

АСТАНА, 25 мамыр – Sputnik. Қазақстанда әлеуметтік маңызы бар азық-түліктің бағасы үш аптадан бері өспеді. Бұл туралы үкіметте азық-түлік инфляциясы талқыланған отырыста айтылды.

2026 жылдың сәуір айының қорытындысы бойынша азық-түлік инфляциясы 0,7%-ды құрады. Жылдық инфляция баяулап, 11,3%-ға дейін төмендеді (2025 жылдың желтоқсанында – 13,5%, қаңтарда – 12,9%, ақпанда – 12,7%, наурызда – 11,7%).

"Әлеуметтік маңызы бар азық-түлік тауарлары бағасының индексі қатарынан үшінші апта бойы 0% деңгейінде сақталып отыр. Бағаның тұрақтануына негізгі үлесті Астана және Алматы қалалары (өсім – 0%), Шымкент қаласы мен Түркістан облысы (-0,1%), Алматы облысы (-0,5%), Ақмола облысы (-0,9%) сияқты ірі өңірлер қосып отыр", - деп жазылған үкіметтің хабарламасында.

Қызанақ (-25,6%), қырыққабат (-18,7%), сондай-ақ күнбағыс майы, балық, қарақұмық жармасы мен ұн бағасы төмендеді. Сонымен қатар кейбір көкөніс түрлері бойынша өсім сақталды. Мысалы пияз – 28,6%-ға, сәбіз – 15,7%-ға, картоп – 10,4%-ға қымбаттады.