Әлеуметтік қолдау тетіктері бақылауға алынуы тиіс

 «Әлеуметтік жеңілдіктердің шамадан тыс көбеюі масылдық пен алаяқтыққа жол ашты».

Мемлекет басшысы «Түркістан» газетіне берген сұхбатында әлеуметтік қолдау тетіктерін бақылауға алып, жүйелеу қажеттігін алға тартты. Бұған жекеменшік мектептер мен емханаларға бөлінген мемлекеттік субсидиялардың тиімсіз игерілуі түрткі болғанын атап өтті. Президенттің айтуынша, жекешелендірілген медицина мекемелері көбіне күрделі құрал-жабдықтар сатып алмайды, тексеруден өту үшін науқастарды мемлекеттік емханаларға жібереді. Ал шынтуайтында емханаларға науқастардың санына қарай емес, «тіркелген» адамдардың санына байланысты бюджеттен ақша бөлінеді. Сол себепті жұмсалған қаржыны игеруде ашықтықты қамтамасыз ету үшін үрдісті толықтай цифрландыру қажет дейді мемлекет басшысы.

ЦИТАТА: Қасым-Жомарт Тоқаев - Қазақстан Республикасының Президенті:

«Жалпы бұл күрделі мәселе, Үкімет бұған назар аударуға тиіс. Мен лауазымды тұлғалардың мұндай жағдайға жол беріп қана қоймай, мемлекет мүддесіне қайшы келетін нәрселерді «өз қолымен» жасағанына таңқаламын. Бір сөзбен айтқанда, тиісті мекемелердің жөнсіз іс-әрекеттерінің кесірінен білім беру және денсаулық сақтау салаларындағы жеке кәсіпкерлік ұғымы бұрмаланып кеткен. Ахуалды түзету қажет. Бюджеттен қаржы бөлінбесе, әлеуметтік нысандардың қиын жағдайға тап болуы мүмкін екенін түсінемін. Бірақ жеке бизнесті түгелдей дерлік мемлекеттің мойнына артып қоюға болмайды».