Алматы облысында 91 мың гектар жер қайтарылды

Алматы облысында биыл 91 мың гектар жер мемлекет меншігіне қайтарылды. Мақсатсыз пайдаланылған немесе уақытылы игерілмеген жерлерді анықтау жұмыстары жалғасып жатыр.

Соңғы үш жылда 518 мың гектар қайтарылса, 330 мыңы қайта айналымға шығарылды. 100 мың гектар алқап ауыл шаруашылығы мақсатында игеріле бастады.  Одан бөлек, 38 жер учаскесіне қатысты жалдау шартын бұзу туралы талап арыз жолданды. Жолдауда айтылған тапсырмаларды орындауға бағытталған шаралар,  Балқаш, Жамбыл, Қарасай, Кеген аудандарында іске асып жатыр. Аудандар мен Қонаев қаласының әкімдігі биыл жер телімдерін бөлу мақсатында жеті рет конкурс өткізді.

Артықбай Болғанбаев, Облыстық Жер қатынастары басқармасы басшысының орынбасары:

- Облыстық прокуратурамен, Жер ресурстарын басқару департаменттерімен бірге осы жұмысты, шараларды жүргізіп жатырмыз. Ауыл шаруашылығы министрлігіне қарасты жер ресурстарын басқару комитетінің бізге қойған жалпы жоспары болатын жер қайтару бойынша 90 мың гектар жерді құраған. Жыл басынан бері 91 мың гектар аумақты алатын 308 жер учаскесі қайтарылды.