Алматы облысында бір апта өртенген қоқыс полигоны жабылуы мүмкін

Бұл туралы Алматы облысы экология департаментінің мемлекеттік экологиялық бақылау бөлімі басшысының міндетін атқарушы Алина Түсіпбаева айтты.

— 2025 жылы «ADC TAZA ALEM» ЖШС-ына қарасты қатты тұрмыстық қалдықтар полигонында тіркелген өрттің жалпы ауданы 12 гектар болды, — деді Алина Түсіпбаева.

Айтуынша, полигонға 2020 жылдан 2027 жылға дейінгі мерзімге экологиялық рұқсат берілген. Құжат бойынша жылына 7354 тонна қалдық көмуге рұқсат етілген. 2023–2025 жылдар аралығында нысанда бірнеше мәрте экологиялық заңнама талаптарының бұзылуы тіркелген.

— Қалдықтарды сақтау және жағу кезінде өрт қауіпсіздігі мен атмосфералық ауаны қорғау талаптарының сақталмауы анықталды. ҚР ӘҚБтК-нің 336-бабы 1-бөлігі бойынша әкімшілік жауапкершілік шаралары қолданылды. Аталған мерзімде салынған айыппұлдардың жалпы сомасы 1 452 000 теңгеге жетіп, толық көлемде өндірілді, — деді ол.

Сонымен қатар 2025 жылы полигон аумағында тіркелген өрт фактілері бойынша Алматы облысының мамандандырылған табиғат қорғау прокуратурасы кешенді тексеріс жүргізуге бастама көтерген.

Алина Түсіпбаева Іле ауданына қарасты Ащыбұлақ ауылдық округіндегі заңсыз қалдық төгілген учаскелер бойынша да ақпарат берді. Тереңқара өзені бойында рұқсатсыз төгілген құрылыс, тұрмыстық және өндірістік қалдықтар анықталған.

— 2025 жылғы 22 тамызда тіркелген бұл құқықбұзушылықтар бойынша үш тұлғаға әкімшілік айыппұл салынды. Оларға экологиялық заңнама талаптарын орындау, өзен арнасын қалпына келтіру және келтірілген залалды өтеу бойынша нұсқамалар берілді, — деді маман.

Еске салайық, бұған дейін Алатау қаласының қоқыс полигонындағы ірі өртке байланысты жергілікті ауқымдағы техногендік сипаттағы төтенше жағдай режимі енгізілді.

Қатты тұрмыстық қалдықтар полигонындағы өрт бір аптадан кейін сөндірілді.