Алматыда әрбір төртінші автокөлік шығарындылар бойынша тексеруден өте алмады

Жыл басынан бері Алматыда 1,3 мыңнан аса автокөлік зиян шығарындылар нормасын асырған, - деп хабарлайды Tengri Auto.

Eco Almaty мәліметінше, 5 496 автокөлік тексеріліп, оның 1 301-інде пайдаланылған газдардағы зиян заттардың мөлшері нормадан асқан. Осылайша, тексерілген әрбір төртінші көлік сынақтан өтпеген болып шықты.

Мұндай көлік иелеріне қатысты әкімшілік хаттамалар толтырылды.

"Алматыда автокөлік шығарындыларын бақылау қаланың атмосфералық ауасын қорғау ережелері аясында тұрақты түрде жүргізіледі және белгіленген экологиялық нормативтерге сәйкес келмейтін көліктерді анықтауға бағытталған", - деді компаниядағылар.

Алматыда LEZ аймағы пайда болды

Еске салайық, биыл 28 сәуірінде Алматыда LEZ бағдарламасының пилоттық кезеңі басталған болатын.

Бөгенбай батыр көшесінен оңтүстікке қарай, Абай даңғылынан солтүстікке қарай, Желтоксан көшесінен шығысқа және Достық даңғылынан батысқа қарай орналасқан шаршы аумақта жыл аяғына дейін цифрлық инфрақұрылымды тестілеу және көлік ағынын есепке алу жүйелерін баптау жұмыстары жүргізіледі.

Бұл кезеңде жүргізушілерге айыппұл салу жоспарланбаған.

Не тексеріледі?

"Алматы паркинг" мәліметінше, техникалық тексеруден өту кезіндегі басты шарт – ҚР СТ 1433-2023 стандартына сәйкес рұқсат етілген шекті деңгейден аспау.

ҚР СТ 1433-2023 стандарты бойынша бензин және газбен жүретін көліктер көміртегі тотығы (CO) мен көмірсутектердің (CH) мөлшеріне тексеріледі.

Дизельді көліктерде мыналар тексеріледі:

түтіндік деңгейі, күйе сүзгісінің болуы, Selective Catalytic Reduction (SCR) жүйесінің жұмысы, температура, пайдаланылған газдар, NOx және басқа да экологиялық компоненттер датчиктерінің жарамдылығы.

Тәртіп бұзу дерегі камералар арқылы тіркеледі – жүйе мемлекеттік тіркеу нөмірін оқып, автокөліктің техникалық тексеруден өткен-өтпегенін және оның нәтижелерін автоматты түрде тексереді.

Google News арқылы жаңалықтарымызды қадағалаңыз

Жазылу