Алматыда Бибі Сана кітабы жарыққа шықты

Алматыдағы Ұлттық кітапханада көрнекті жазушы, Қазақстанның еңбек сіңірген қайраткері, Халықаралық «Алаш» әдеби сыйлығының лауреаты Бибігүл Иманғазинаның «Бибі-Сана» трилогиясы таныстырылды.

«Ел арасында Бибі ана атанып кеткен жазушы тағдырымен күресе жүріп, оны шығармасына арқау етті. Қаламгерлік пен қайраткерлікті қатар алып жүрген мейірімді жан құлағанға сүйеу болып, жылағанның жасын сүртті», - дейді замандастары. Бибігүл Иманғазина мүмкіндігі шектеулі аналарға жұмыс беріп, тағдыры қиын талай жастың жоғары білім алуына ықпал еткен. Жаңа еңбектің орыс және түрік тіліндегі аудармасы және көзі нашар көретіндер үшін арнайы Брайль қарпінде басылған нұсқасы да оқырманға жол тартты.

Бибігүл Иманғазина, жазушы, Қазақстанның Еңбек сіңірген қайраткері:

- Бес сағаттан артық ұйықтап көрген емеспін. Барлығына бірдей үлгере алмаймын. Қаншама хат келеді. Әр хаттың артында еңіреген  әйелдердің даусы тұрады. Қалай оған жауап бермейсің, қалай онымен айналыспайсың? Ол тәрбиеге байланысты ма әлде қанға байланысты ма? Ешкім мынаны істе деп айтып көрген емес. Барлығы өз жүрегіммен.

Әлия Бөпежанова, сыншы, Қазақстанның Еңбек сіңірген қайраткері:

- Жалпы айтқанда бұл кісі – тағдырлы адам. Өзінің тағдырымен күресе жүріп, айналасына, ата-анасына деген махаббаты сол қасіретті жеңдірді деп ойлаймын. Жасөспірім қыздан Бибі анаға, Биді анадан «Бибі сана» деңгейіне көтерілген тұлға. Ол кісіге өтте өте қайран қаламын. Феномен ғой.