Алматыда Ресейдің жалған мемлекеттік нөмірлері сатылған күдікті ұсталды

Алматыда жалған мемлекеттік нөмірлерді заңсыз дайындау мен сатуды ұйымдастырды деген күдікпен ер адам ұсталды, деп хабарлайды Tengri Auto Бас көлік прокуратурасына сілтеме жасап.

Тергеу мәліметтері бойынша, жалған нөмірлер Ресейден экспресс-жеткізу қызметі арқылы жеткізіліп, кейін Қазақстанның түрлі өңіріндегі тапсырыс берушілерге жіберіліп отырған.

Жедел іс-шаралар барысында құқық қорғау органдарының қызметкерлері жалған мемлекеттік тіркеу нөмірлері мен басқа да заттай дәлелдемелерді тәркіледі.

Қазіргі уақытта осы заңсыз схемаға қатысы бар басқа да адамдар анықталып жатыр.

Бас көлік прокуратурасы жалған мемлекеттік тіркеу нөмірлік белгілерін пайдалану қылмыстық жауапкершілікке әкеп соғатынын және жол қозғалысы қауіпсіздігіне тікелей қатер төндіретінін ескертті.

Еске сала кетейік, Қазақстанда жалған мемлекеттік нөмірлерді пайдаланғаны үшін қылмыстық жауапкершілік енгізілуі мүмкін. Мұндай ұсынысты Мәжіліс депутаты Бақытжан Базарбек білдірді.

Депутаттың айтуынша, жалған нөмірлерді пайдалану мәселесі жаппай сипатқа ие болып, соңы ауыр салдарға соқтырып жатыр.

"Бұдан көптеген адам зардап шегеді, тергеу барысында жол-көлік оқиғасын жасаған адамның жалған мемлекеттік нөмір пайдаланғаны анықталатын апаттар өте көп", - деді Базарбек Мәжіліс отырысында.

Ол мұндай фактілер Алматыда ғана емес, еліміздің басқа өңірлерінде де тіркеліп жатқанын атап өтті.

Бұл мәселе расында да жаппай сипатқа ие. Мәселен, "ҚазАвтоЖол" мәліметтері бойынша, жыл басынан бері еліміздің ақылы жолдарында жалған, жасырылған, өзгертілген немесе оқылмайтын мемлекеттік тіркеу нөмірі белгілерін пайдалану бойынша 1 942 дерек анықталған.

Мамандар мұндай автокөліктер туралы мәліметтер шара қолдану үшін бірден полиция қызметкерлеріне берілетінін атап өтті.

Тағы оқыңыз: Алматы тұрғынына бөтен көлік үшін айыппұл салынған. Мұндай жағдайда не істеу керек?

Google News арқылы жаңалықтарымызды қадағалаңыз