Көліктерге жалған мемлекеттік нөмір таққан автосалон қызметкері ұсталды

АЛМАТЫ, 20 қараша – Sputnik. Ақтөбеде автосалон қызметкері жаңа көліктерге мемлекеттік нөмірді заңсыз тағып, көлік басқарған, деп хабарлайды облыстық полиция департаментінің баспасөз қызметі.

18 қарашада патрульдік полиция қызметкерлері Shangan маркалы автокөлікті тоқтатқан. Тексеру барысында жүргізушінің көлік құралына жалған мемлекеттік тіркеу нөмірін тағып алғаны белгілі болды.

"Қорғау" базасы мен көпфункционалды камералардың көмегімен аталған әкімшілік құқық бұзушылық толық дәлелденді. Бұдан бөлек, жалған нөмірлер автосалондағы басқа да автомобильдерге қолданылған", - дейді ведомство.

Департамент Sputnik Қазақстан тілшісіне мемлекеттік нөмірдің қайдан алынғанын айтып берді. Ведомствоның мәліметінше, автосалон қызметкері тіркеуден шығып қалған нөмірді пайдаланған.

Қызметкер нөмірді тағып алып, көлікті жууға және жұмыс барысындағы қажеттіліктер үшін пайдаланған. Автосалондағы су жаңа көлік айып тұрағына қойылды. Жүргізушіге қатысты әкімшілік хаттамалар толтырылып, Ақтөбе қаласының мамандандырылған ауданаралық әкімшілік сотына жолданды.