Алматыда тар жолға сыймай қалған автобус үш көлікті арықтан асырып жіберді

Куәгерлердің айтуынша, №32 бағыттағы автобус Науай көшесімен оңтүстік бағытта келе жатып, Біржан көшесіне жетпей жол жиегінде тұрған Hyundai Elantra көлігіне соғылған.

Сурет: Zakon.kz

Қатты соққыдан Hyundai Elantra алдында тұрған Volkswagen Golf көлігіне соқтығысқан. Ал екі көлік өз кезегінде Lada 2111 автокөлігіне тиіп кеткен.

Сурет: Zakon.kz

Соққының күші соншалық, автобус үш көлікті де жол жиегінен арықтың арғы бетіне ығыстырып жіберген.

Сурет: Zakon.kz

Абырой болғанда, оқиғадан ешкім зардап шеккен жоқ. Автобус жолаушыларына медициналық көмек қажет болмаған. Ал жол жиегінде тұрған көліктердің ішінде ешкім болмаған.

Сурет: Zakon.kz

Автобус жүргізушісі болған жағдайды қысқаша: "Жол тар болды. Сыймай қалдым", – деп түсіндірді.

Бұған дейін Алматыда түнде екі жүк көлігі соқтығысып, тұрғын үй аумағына кіріп кете жаздағанын жазғанбыз.