Алматыда жаңадан ашылған өнер музейін бір айда 85 мың адам тамашалаған

Алматыдағы жаңадан ашылған өнер музейін бір айдың ішінде 85 мың адам тамашалаған.

Онда әлемге танымал суретшілердің туындылары қойылған. Бұрын дәл осы картиналарды көру үшін өнерге құштар жандар шетел асатын. Қазір заманауи музей  жұртшылықтың сұранысына қарай  әртүрлі тақырыпта көрме ұйымдастырады.   

Испан суретшісі Жауме Пленсаның 12 метрлік мүсіні  өнер музейі ашылмай тұрып, жұртшылықтың назарын  аударды. Оның көлемі, ерекше пішіні алыстан мен мұндалайды. Қазір мұнда кісі қарасы қалың. Көрме залының бірінде  Алмагүл Меңлібаеваның «Мен бәрін түсінемін» атты жеке көрмесі өтіп жатыр. Кескіндеме, графика, бейне инсталляция, фотосурет пен тоқыма бұйымдарынан жасалған жұмыстар ешкімді бей-жай қалдырмайды. Заманауй өнерді әр қырынан алып қарауға болады. Оны түсіну үшін алдымен автордың қандай ойды бергісі келгенін біліп алған жөн.

Инга Лаце, ALMATY MUSEUM OF ARTS  үйлестірушісі:

- Мәтін оқи аласыз, медиация тыңдай аласыз. Музейде медиаторларымыз бар. Мұндағы туындылардың барлығы ерекше. Өйткені автор оны сүйіспеншілікпен, жан қалауымен жасаған. Осындай картиналар инсталляциялар өнерді байытады. 

Музейдің орталық алаңы «Өнер көшесі» деп аталады. Төбесі шыныдан. Қабырғасының биіктігі 18 метр. Британдық Chapman Taylor бюросының сәулетшілері Шарын шатқалын көріп, одан шабыт алған. 10 000 шаршы метр аумақта отандық және шетелдік суретшілердің 700 туындысы қойылған. Жақын арада мұнда  Париж, Нью-Йорк және Орталық Азия өнертанушыларының қатысуымен шеберлік сабақтары және кездесулер өтеді.

Адиса Кин, ALMATY MUSEUM OF ARTS қоғаммен байланыс жөніндегі менеджері:

- Әлемдік жұмыстарды Қазақстанға алып келіп біздің өзіміздің қарапайым қазақтардың балалары соны 2 мың 500 теңгеге келіп көре алатыны. Яей Кусама деген суретші бар. Яей Кусама ол дүние жүзілік жұмыстары ең қымбат суретші. Ол 96 жаста Жапонияда тұрып жатыр. Соның жұмысын көру үшін бұрын Парижға баратын еді адамдар. Лондонға баратын еді. Токиоға, Нью-Иоркқа баратын. Қазір қарапайым қазақтың баласы мектептен шығып 500 теңгеге келіп көре алады. 

Ал мына «Жол айырығы» атты мүсінді бірнеше бөлікке бөліп әкелді. Салмағы 150 тоннадан, биіктігі төрт метрден асады. Туындының авторы, әйгілі американдық мүсінші Ричард Серра. Ол осыдан  бір жыл бұрын өмірден өтті. Музейде оның жұмыстарын көрсетуге рұқсат беретін құжаттардың барлығы бар. Демалыс күндері музейге кіру үшін алматылықтар мен қала меймандары сағаттап кезекте тұрады. Сала мамандарының айтуынша, бұл өнерге деген махаббат пен мәдени өмірдегі шынайы бетбұрысты білдіреді. 

Қарлығаш Қайыпбекова Мұхит Құдықбаев