120 мың көрермен тамашалаған маусым

Өткен маусымның басты шығармашылық жетістігі – театрдың арнайы тапсырысымен дүниеге келген Серікжан және Әліби Әбдінұровтардың «Қыпшақ қызы Аппақ» ұлттық операсының әлемдік премьерасы болды. Сонымен қатар Джузеппе Вердидің «Риголетто» операсы мен балетмейстер Сұлтанбек Ғұмар сахналаған «Мәңгіліктің төрт сыры» балеті көрерменге жол тартты. Осылайша, театр репертуары үш жаңа қойылыммен толықты.

Маусым аясында театрда 60 көрме ұйымдастырылып, мәдени-ағартушылық бағыттағы жобалар кеңінен жүзеге асты. Сондай-ақ Бейбітшілік және келісім сара­йында театрдың екінші сахнасының ашылуы шығармашылық кеңістіктің кеңеюіне мүмкіндік берді.

Халықаралық ынтымақтастық та жаңа деңгейге көтерілді. Бір жарым айға созылған «Опералия-2026» халықаралық фестивалі үш сахнада өтіп, оған әлемнің оннан астам елінен келген өнерпаздар қатысып, шамамен 18 мың көрермен жиналды. Балет труппасы Маскаттағы Корольдік опера театрында «Коппелия» балетін ұсынып, Алматы мен Сочиде өнер көрсетсе, опера труппасы Павлодар және Ақтөбе қалаларына гастрольдік сапармен барды.

Маусым бойы театр солистері әлемнің беделді сахналарында өнер көрсетіп, елорда көрермені Диана Вишнева, Альбина Шағимұратова және Борис Эйфман балеті театрының қатысуымен өткен шығармашылық жобаларды тамашалау мүмкіндігіне ие болды.

Ұлттық өнерді ұлықтау да театр қызметінің басым бағыты ретінде жалғасын тапты. Театр шымылдығы Мұхтар Әуезов пен Ахмет Жұбановтың «Абай» операсымен ашылып, Ермек Серкебаевтың 100 жылдығына, Ахмет Жұбанов пен Латиф Хамидидің мерейтойларына арналған концерттер, қайырымдылық және ағартушылық жобалар ұйымдастырылды.

XIII театр маусымы Джузеппе Вердидің «Дон Карлос» операсымен қорытындыланды. Алан Бөрібаевтың дирижерлігімен өткен айтулы қойылымдар «Опералия-2026» халықаралық фестивалінің де мәресіне айналып, театрдың шығармашылық маусымын жоғары деңгейде түйіндеді.