AMANAT партиясының Хатшысы Александр Данилов 102 жастағы ардагер Анна Котованы Жеңіс күнімен құттықтады

Қастерлі мерекелер – Жеңіс күні мен Отан қорғаушы күні қарсаңында «AMANAT» партиясының Хатшысы Александр Данилов Осакаров кентіне арнайы барып, соғыс жылдары аты аңызға айналған медбике, 102 жастағы Анна Котоваға құрмет көрсетті, – деп хабарлайды Aikyn.kz сайты.

Анна Котованың өрнекті өмір жолы – ерлік пен адамзат баласына деген шексіз сүйіспеншіліктің шежіресі. Ол соғыс оты өршіп тұрған 1943 жылы 2-Украина майданы құрамында эвакуациялық госпиталь медбикесі ретінде ұрыс даласына аттанды. Өрімдей жас қыз жаралы жауынгерлерге көмек көрсетіп, олардың өмірін сақтап қалу үшін аянбай еңбек етті. Сарбаздарды ажалдан арашалады.

Бірақ 1945 жылғы Жеңіс мерекесімен оның қызметі аяқталған жоқ. 1946 жылға дейін ол Мажарстанда еңбек етіп, бейбіт өмірді қалпына келтіруге атсалысты. Елге оралғаннан кейін Анна Никаноровна ғибратты ғұмырын медицина саласымен сабақтастырып, Қарағанды облысының денсаулық сақтау жүйесінде зейнетке шыққанға дейін абыройлы қызмет етті.

Бүгінде Анна Никаноровна Осакаров кентінде тұрып жатыр. Қаңтар айында 102 жасқа толғанына қарамастан, ойы – сергек, жүрегі – ерекше мейірімге толы. 9 мамыр – ол үшін ерекше күн. Қызы Германиядан арнайы келіп, Жеңіс күнін анасымен бірге қарсы алады.

Жылы жүздесу барысында ардагер сол бір ауыр жылдар туралы естеліктерімен бөлісіп, бүгінгі ұрпаққа өсиетін айтты.

«Майданда біз марапат емес, адамдардың өмірін қалай сақтап қаламыз деп ойладық. Мен көп қасіретті де, жеңіске деген үлкен сенімді де көрдім. Бүгінде еліміздегі бейбіт өмірді көру – мен үшін үлкен бақыт. Ең бастысы – бейбітшілікті сақтап, бір-біріңізге мейіріммен қараңыздар. Біз жанашырлық танытқан кезде ғана адами қасиетімізді сақтап қаламыз», – деді Анна Котова.

«AMANAT» партиясының Хатшысы Александр Данилов ардагерге естелік сый-сияпатын табыстап, Ұлы Жеңіске қосқан баға жетпес үлесі үшін айрықша алғысын білдірді.

«Анна Никаноровна – тағдыры тағылымды, ерік-жігері мықты адам. Майданда медбике болу – ерекше ерлік. Жеңіс мұрагері саналатын біздер үшін мұндай жандар – адамгершіліктің бағдары. «AMANAT» партиясы ардагерлердің ерлігін есте сақтап қана қоймай, оларға күн сайын қамқорлық көрсетуді өзінің негізгі міндеті деп біледі. Біз Өздеріңізді мақтан тұтамыз және ерліктеріңіз туралы тарихи шындық ұрпақтан ұрпаққа жетуі үшін бар күшімізді саламыз», – деді Александр Данилов.

«AMANAT» партиясы қариялар мен ардагерлерге әлеуметтік қолдау көрсетуге бағытталған «Ардагерлерді ардақтайық» жобасын жүйелі түрде жүзеге асырып келеді. Анна Никаноровна сынды жалғызбасты зейнеткерлерге атаулы көмек көрсетіледі: әлеуметтік қызметкерлер қол ұшын созады, партия мүшелері мен «Жастар Рухы» жастар қанатының еріктілері тұрмыстық мәселелерді шешуге және бос уақытын ұйымдастыруға көмектеседі.

Осы мереке күндері партия белсенділері еліміздің барлық өңірінде соғыс ардагерлерін арнайы барып құттықтап, қайырымдылық іс-шараларын өткізуде. Сонымен қатар «Таза бейсенбі» экологиялық-патриоттық бастамасы аясында мемориалдарды ретке келтіріп, қариялардың аулалары мен үйлерін тазалауға көмектесіп жатыр.