AMANAT сайлауалды бағдарламасы аясында Алматыда қандай өзгеріс болды?

Алматы қаласында «AMANAT» партиясының сайлауалды бағдарламасы жүйелі түрде жүзеге асырылуда. Қалалық мәслихаттағы депутаттық фракция отырысында партияның 2023–2025 жылдарға арналған Жол картасының орындалу барысы қаралды. Қатысушылар бағдарламаның қағаз жүзінде қалып қоймай, нақты орындалып жатқанын және оның нәтижесі қала келбеті мен алматылықтардың тұрмысында айқын көрініс тауып отырғанын атап өтті, - деп хабарлайды Aikyn.kz.  

Үш жылда Алматыда жаңа әлеуметтік және инфрақұрылымдық негіз қалыптасты. 34,2 мың оқушы орнына арналған 20 мектеп салынды, шамамен 2 мың орындық 6 қосымша ғимарат пайдалануға берілді, 7 балабақша ашылды. Сондай-ақ қалада қосымша білім беруге арналған заманауи орталықтардың саны артуда. Бұл мыңдаған баланың сапалы білім алуына, өз қабілетін дамытуына кең мүмкіндік беріп отыр. 

Денсаулық сақтау саласында да елеулі өзгерістер бар: бір ауысымда 1140 адамды қабылдауға қауқарлы 5 медициналық нысан іске қосылды, 140 келушіге арналған ерте араласу орталығы ашылды, 1200-ден астам азамат оңалту құралдарымен қамтамасыз етілді. Осылайша медициналық көмектің қолжетімділігі мен сапасы арта түсті. 

Қала экономикасы да қарқынды дамуда: индустриялық аймақта 42 өндірістік жоба іске қосылып, 9,2 мың тұрақты жұмыс орны құрылды. Жалпы үш жылда Алматы қаласында 199 мыңнан астам жұмыс орны ашылды. 16 мыңнан астам бизнес-жоба мемлекеттік қолдаумен қамтылып, 1100-ден астам грант берілді. Бұл кәсіпкерліктің дамуына және жаңа экономикалық белсенділіктің қалыптасуына серпін берді. 

Инфрақұрылым саласында және қалалық ортада да ауқымды жұмыс жүргізілді. 700 шақырымнан астам жол салынып, жөнделді, 330 шақырымнан астам су құбыры тартылды, сондай-ақ инженерлік желілер жаңартылды. ал Ал орталықтандырылған сумен қамтамасыз ету деңгейі 99,2%-ға дейін жетті. Бұдан бөлек 1019 аула абаттандырылып, 224 көпқабатты тұрғын үй күрделі жөндеуден өтті және 331 лифт ауыстырылды. Қоғамдық көлікті жаңарту мақсатында 212 троллейбус және газбен жүретін 1200 автобус сатып алынды. Нәтижесінде  қала маңында 30 маршрут ашылды.

 Әлеуметтік саясат пен жастарды қолдау мәселесіне ерекше көңіл бөлінуде. «Алматы жастары» бағдарламасы аясында 4554 жас азамат баспанаға қол жеткізді және 30 мыңнан астам жастар өкілі жұмыспен қамтылып, 2 мыңнан астамы жастар практикасына жіберілді.

«AMANAT» партиясының сайлауалды бағдарламасы аясында Алматыда жүйелі әрі кешенді жұмыс жүргізіліп, инфрақұрылым, экономика және әлеуметтік бағыттағы өзгерістер халықтың тұрмысын жақсартуға және қаланың орнықты дамуына берік негіз қалыптастырып отыр. Партия алдағы уақытта да азаматтар алдындағы міндеттемелерін орындау жұмысын жалғастыра береді.