Анасынан адасып, тас жолға шығып кеткен: павлодарлық отбасы елік төлін құтқарып қалды

Павлодарлық отбасы республикалық тасжолдың қозғалыс бөлігінде елік лағын құтқарып қалды, деп хабарлайды Tengri Life.

Павлодарлық отбасы республикалық тасжолдың қозғалыс бөлігінде елік лағын құтқарып қалды, деп хабарлайды Tengri Life.

Дәрменсіз төл кез келген сәтте көлік астына түсіп қалуы мүмкін еді. Табылған лақ туралы Tengri Life тілшісіне Павлодар орман және жануарлар дүниесін қорғау жөніндегі мекеме басшысы Аждар Жүсіпов айтып берді.

"Павлодарлық отбасы Шарбақты тасжолымен келе жатып, жол бойында жүрген елік лағын байқап қалған. Бұл өте сирек кездесетін жағдай, мыңнан бір десе болады. Павлодарлықтар лақты алып кетіп, 109 қызметіне хабарласқан, ал мамандар оны біздің орманшыларға тапсырды", - деді Жүсіпов.

Аждар Жүсіповтің айтуынша, табылған төлдің туғанына әлі бір ай да толмаған.

Фотоны Аждар Жүсіпов ұсынды

"Бәлкім, анасы су ішуге немесе басқа жаққа кеткен шығар, ал лақ одан көз жазып қалған немесе өзі серуендеуге шығып, қарбалас тасжолға тап болған", - дейді Жүсіпов.

Жануарды құтқарған отбасының қызы Әделдің өтініші бойынша елік лағына Томи деген есім берілді.

Фотоны Аждар Жүсіпов ұсынды

Қазіргі уақытта елік лағы Павлодар орман және жануарлар дүниесін қорғау жөніндегі мекеме мамандарының бақылауында, кейін ол орманшыларға тапсырылады. Лақ табиғатта өз бетінше өмір сүруге әлі тым кішкентай, сондықтан алғашқы уақытта ол емізікпен сиыр сүтімен қоректендіріледі.

Google News арқылы жаңалықтарымызды қадағалаңыз