АҚШ та Қазақстаннан барған 200 студент баспанасыз қалды алмасу ережелерін өзгерту ұсынылды

Work and Travel бағдарламасымен АҚШ-қа барып, баспанасыз және ұйымдастырылған трансферсіз қалған 200-ге жуық қазақстандық студентке қатысты оқиғадан кейін, Қазақстанда алмасу бағдарламаларын ұйымдастыратын агенттіктердің жұмыс ережелерін өзгерту ұсынылды, деп хабарлайды Tengri Travel.

"Қазақстандықтар шетелде тағдыр тәлкегіне қалды"

Құрылтай депутаты Константин Петров туризм және спорт, сондай-ақ ғылым және жоғары білім министрлеріне депутаттық сауал жолдады. Ол жақында болған резонансты оқиғаларды еске салды.

"Work and Travel бағдарламасымен АҚШ-қа кетіп, ұйымдастырушылардың алаяқтығынан шетелде далада қалған 200 қазақстандық студенттің жағдайы, сондай-ақ Ақтөбеде ондаған адамның жоқ турлар үшін аттарына несие рәсімдеген жалған фирманың құрбаны болуы -
туристік қызмет пен жастар алмасу бағдарламаларын реттеу саласындағы қордаланған күрделі мәселелерді әшкереледі".

Депутат алмасу бағдарламалары қатаң реттелетін АҚШ пен Еуропа Одағы елдерін мысалға келтірді.

Оның айтуынша, АҚШ-та мұндай бағдарламаларды тек Мемлекеттік департамент мақұлдаған ұйымдар ғана жүргізе алады. Олар студенттерді сақтандырумен, шұғыл байланыспен қамтамасыз етуге және жұмыс берушілерді алдын ала тексеруге міндетті.

Еуропа Одағында ұйымдастырушылар сапардың толық барысына жауап береді. Сондай-ақ қаржылық кепілдіктер қарастырылған: егер компания банкротқа ұшыраса немесе қиындықтар туындаса, олар қатысушылардың елге оралуына және жұмсалған қаражатты өтеуге көмектеседі.

"Өкінішке қарай, Қазақстанда жастарды тағылымдамаға және шетелге жіберетін делдалдардың қызметі тиісті деңгейде лицензияланбайды және бақыланбайды", – деп түйіндеді Петров.

Константин Петров шетелдік тағылымдамалар мен алмасу бағдарламаларын ұйымдастыратын агенттіктер үшін міндетті аккредиттеуді енгізуді ұсынды. Мұндай компаниялар ресми шетелдік ұйымдармен тікелей жұмыс істеуі тиіс.

Сондай-ақ депутат адамдар шарт жасасудан бұрын компанияны тексере алуы үшін аккредиттелген агенттіктердің ашық тізімін жасауды ұсынды.

Сонымен қатар ұйымдастырушыларды банкроттық немесе алаяқтық жағдайларына қарсы сақтандыруы немесе резервтік қоры болуына міндеттеу жоспарланып отыр. Бұл қаражат азаматтарды елге қайтаруға және шұғыл эвакуация шығындарын жабуға көмектесуі тиіс.

Қыркүйек басында АҚШ-та Work and Travel бағдарламасына қатысқан 200-ге жуық қазақстандық студент ұйымдастырылған сапар кезінде қиындықтарға тап болған. Лос-Анджелестен Сан-Францискоға сапар тоқтатылғаннан кейін топ автобуссыз және ұйымдастырылған трансферсіз қалған. Қатысушылар қонақүйге орналасу кезінде де мәселелерге тап болғанын мәлімдеді.

Бізді Google-дың негізгі дереккөздер тізіміне қосыңыз