Ақтау портының әлеуеті артады

Сурет: traceca-org.org

Ақтау теңіз портында акваторияны те­рең­дету жұмыстары расымен де қарқын алды. Көлік министрлігінің мәліметінше, жоба теңіздегі кеме қатынасының қауіпсіздігін күшейтіп, Транскаспий халықаралық көлік бағытының (ТХКБ) өткізу мүмкіндігін едәуір арттыруға бағытталған. Қазір бас мердігер – China Harbour Engineering Company Ltd. компаниясы геодезиялық зерттеу жұмыстарын толық аяқтап, жиналған деректерді өңдеген. Бұл негізгі құрылыс кезеңіне өтуге мүмкіндік береді.

Дайындық аясында арнайы су түбін тереңдететін флот, техника мен жабдықтар Ақтау портына жеткізіліп жатыр. Жасанды үйінді алаңында қорғаныс бөгетін тұрғызу жұмысы да қатар жүргізіле бастады. Бүгінге дейін жалпы ұзындығы 785 метр болатын бөгеттің 680 метрі салынды. Негізгі су түбін тереңдету жұмыстары шілде айының екінші жартысында басталады деп күтілуде. Биылғы жылдың соңына дейін жобаны толық аяқтау жоспарланып отыр.

Жоба іске асқаннан кейін порт акваториясындағы рұқсат етілетін шөгу тереңдігі 6–7 метрге дейін ұлғаяды. Соның нәтижесінде кемелер толық жүк тиеп қатынай алады. Бұл жүк тиеу-түсіру жұмыс­тарының тиімділігін арттырып, порттың жалпы өнімділігін едәуір көтермекші.

Мамандардың айтуынша, жоба Транскаспий халықаралық көлік бағытының дамуына тың серпін береді. Жоспарға сәйкес, 2028 жылға қарай дәліздің жылдық өткізу қабілеті қазіргі 6 миллион тоннадан 10 миллион тоннаға дейін ұлғаяды. Бұл еліміздің Еуропа мен Қытай арасындағы маңызды транзиттік көпір ретіндегі рөлін одан әрі нығайтып, халықаралық жүк тасымалы нарығындағы бәсекелік мүмкіндігін арттырады.

Транскаспий бағытының маңызы жыл сайын артып келеді. Биылғы бес айдың қорытындысында осы дәліз арқылы Қытайдан Еуропаға бағытталған контейнерлік тасымал көлемі өткен жылдың сәйкес кезеңімен салыстырғанда 30 пайызға көбейген.

Ақтау портын жаңғыртуға бағытталған бұл жоба еліміздің көлік-логистика саласын дамытуға арналған кешенді саясаттың маңызды бөлігі саналады. Порт инфрақұрылымының жаңаруы халық­аралық тасымалдың сенімділігін күшейтіп қана қоймай, Каспий арқылы өтетін дәліздің экономика­лық тартымдылығын да арттыра түседі.