Қазақстанның транзиттік әлеуеті артады

Жетісу облысындағы «Нұр Жолы» кеден бекетінде жаңа айналма жолы пайдалануға берілді.

Енді Қытайдан Қазақстанға өтетін аса ауыр жүк көліктері арнайы бағытпен жүріп, кедендік рәсімдеуден өтеді. Ұзындығы екі жарым шақырымнан асатын кең жолақты жол - өткізу бекетіне түсетін жүктемені азайтып, тауар айналымын арттыруға ықпал етеді.

Салмағы жүз тоннадан, ал, ұзындығы жүз метрден асатын жүк көліктері енді кеден бекетінде кептеліс туғызбайды. Жаңадан салынған жол ауыр техникалардың  емін-еркін әрі кедергісіз өтуіне мүмкіндік береді.

Марат Сағымбек, Панфилов ауданының әкімі:

- «Нұр жолы» кеден бекетінің өткізу қабілетін көбейту мақсатында жеңіл көліктерді және жаңадан шыққан көліктерді тағы да 3,6 мың шақырым жол жасап, МЦПС кеден бекеті арқылы өткізетін боламыз.

Елімізде көлік логистикасымен қатар теміржол желісі де дамытылып жатыр. Былтыр күзде ұзындығы 800 шақырымнан асатын «Достық-Мойынты» жолының екінші бағыты ашылды. Ауқымды жобаның жүзеге асуымен тауар тасымалы бес есе артады.

Әділ Түсіпов, Жүк тасымалдаушы компанияның атқарушы директоры:

- Қыркүйек айынан бері «Достық-Мойынты» бағытындағы жаңа жолмен 1765 жүк және 451 контейнерлік пойыз өтті. Ал ескі жолмен 1778 жүк және 510 контейнерлік пойыз қатынады. Орташа есеппен алғанда екі жолмен тәулігіне 18-19 пойыздан жүреді.

Фархат Исаев, облыстық Кірістер департаментінің бөлім басшысы:

- Аталған желінің іске қосылуымен тасымалданатын жүк көлемі 28 пайызға артты. Яғни 2024 жылы 3 млн тоннадан 2025 жылы 4 млн тоннаны құрады. Бүгінгі таңда Достық теміржол өткізу бекеті арқылы транзиттік жүктің үлесі Жетісу облысы транзитінің 29 пайызын құрайды.

Екі жыл бұрын Қазақстан мен Қытай арасындағы тауар айналымы 12 млн 238 мың тонна болатын. Былтыр бұл көрсеткіш 14 млн 200 мың тоннаға жетті. Транзиттік әлеуетті арттыру мақсатында шекара маңында жаңа әуежай салу жоспарланып отыр. Маңызды жоба еліміздің Орталық Азиядағы  транспорттық хаб ретіндегі рөлін одан сайын нығайтуға ықпал етпек.

Авторлары: Шыңғыс Қалиден, Жеңіс Әбдірешов