Ақтау және Құрық порттарының әлеуеті артты

Ақтау және Құрық порттары арқылы 3 млн тонна бидай тасуға болады.

Таяуда отандық астықты Арменияға жібердік. Бұл астық экспортның үлесі арта түскенін көрсетеді. 

Кезінде теміржолмен Батыстағы шет мемелкеттерге жүкті Ресей арқылы тасымалдасақ, қазір Каспий теңізі арқылы жіберуге мүмкіндік мол және теңіз жолының әлеуеті жылдан жылға артып келеді.

Бүгінде қос порт жылына 6 млн тоннадан аса жүк өткізе алады. Контейнер саны да еселенді. Яғни, жаңа хаб, терминалдар құру маңызды. Ол былтыр қабылданған «Теңіз порттарын дамыту бойынша» кешенді жоспар аясында жүзеге асады.

2030 жылға қарай Ақтау және Құрық порттарының өткізу қабілеті 10 млн тоннаға жетеді. Қазірдің өзінде тасымал көлемі 6 млн тоннадан асып отыр. Әсіресе, Әзербайжан президентінің елге сапары отандық транзиттік әлеуетті еселеуге септесті. Енді Қазақстанның бидайы Әзербайжан арқылы Арменияға жеткізіледі. Бұған дейін астық Ақтау порты арқылы Иранға тасымалданатын.

Жасұлан Керімбаев, ҚР Көлік министрлігі Теңіз порттары басқармасының басшысы:

- 2024 жылдың қорытындысы бойынша 900 мың шамасында бидай тасымалданды. Осы жылы да осы көлемді арттыру бойынша жоспарымыз бар. Бидайды өткізу қуаттылығы бүгінгі күні порттар арқылы 3 млн тоннаны құрайды. Жақында Әзербайжан тарапы Армения мемлекетіне транзитпен бидай өткізуге рұқсат берген жоспары бар. Сол бағытта да біз бидайды тасымалдауға ниеттіміз. 

Ақтау және Құрық порттары арқылы жүк тасымалдау тиімді. Мамандар Таяу Шығыс, Түркия, Жерорта теңізі арқылы Батыс Еуропа, Солтүстік Африка, Солтүстік және Оңтүстік Америка бағытын еңсеріп жатқанымызды айтады. Біздегі зор мүмкіндікке көрші елдер де қызығып отыр.

Қуаныш Есетов, Теңіз көлігі кәсіпкерлері қауымдастығының төрағасы:

- Өзбекстандық, қырғызстандық, тәжістандық әріптестеріміз осыған жоғары қызығушылық білдіруде. Себебі олар да біз сияқты Еуразия құрлығының ортасында қалып, жан-жаққа, мұхитқа, теңізге апаратын өздерінің шикізат, шығарып жатқан өнімдерін апарудың жолдарын қарастыруда. Осылайша, біздің порттарымыз Ақтау және Құрық порты Әзербайжанға жолданып жатқан бағдар бағыты тек қана Қазақстан үшін маңызды емес, жалпы Орта Азия үшін өте жоғары маңызы бар жол.

Әзербайжан елімен Каспийде үлкен паромдық жүйе құру бойынша келісім жасалғаны белгілі. Демек, көп көлемді жүкті Қара теңіздегі порттарға дейін жеткізу көзделеді. Мақсат айқын. Енді теңіздегі отандық флотты дамыту маңызды.

Жасұлан Керімбаев, ҚР Көлік министрлігі Теңіз порттары басқармасының басшысы:

- Қазақстандық теңіз флоты 18 кемеден тұрады. Оны 29 жылға дейін 34 кемеге жеткізу бойынша жоспарымыз бар. Соның ішінде жаңадан салынатын контейнерлік тасымалдау кемелері, сонымен қатар паромдық кемелер осы жылы 2 паром Қазақстан туының астына келу бойынша жоспары бар.

Яғни қос портымыз арқылы Қытай - Еуропа бағытына 300 мың контейнер тасымалдау мүмкіндігі болады. Ол 2029 жылға дейін кезең-кезеңімен жүзеге асырылады.

2025 - 60 мың

2026-2027 - 100 мың

2028 - 200 мың

2029 - 300 мың

Авторы: Мерей Мұратханқызы