Аралтұздың экспорттық әлеуеті артты

«Аралтұз» кәсіпорнына 100 жыл. Бір ғасыр бұрын Арал ауданында тұзды өндіру және өңдеу басталды. Содан бері зауыт бірнеше рет жаңғыртудан өтті. Заманауи технология мен жаңа үлгідегі жабдықтың арқасында өндіріс көлемі ұлғайды. Экспорттық әлеуеті де артып отыр.

Бұл - Арал ауданындағы тұзды көл. Өндіріске қажет шикізат осы жерден алынады. Арнайы фрезерлі комбайндар тұз қабатының ең таза бөлігін жинайды. Оны зауытқа жеткізіп, бірнеше сатылы өңдеуден өткізеді. 

Бержан Рысманбетов, зауыттың бас технологы:

- Тұзды үш сатыда жуу процесі жүреді. Осы тұз көлінен келген шикізат өңделеді, жуылады, тазартылады, електен өтеді. Содан соң барып, өзі тізбектеліп тұз қаптау, қалталау цехтарында әрі қарай қапталып, қалталанып, дайын өнім ретінде сатылымға шығарылады.  

Жүз жылдық тарихы бар зауыт бірнеше рет жаңғыртудан өтті. Соңғы жылдары озық технологиялы құрылғылармен жабдықталған жаңа өндірістік желілер іске қосылды. Мұнда дайындалатын жоғары сапалы өнімнің басым бөлігі экспортталады. 

Дәулет Рақымбаев, зауыт директоры:

- Шағын тұз өндіру орны ретінде басталған зауыт бүгінде Қазақстан тұз өнеркәсібінің көшбасшысы, заманауи технологиялы кәсіпорынға айналды. Бүгінгі күні зауыт 300 мың тонна ас тұзын және 400 мың тоннаға жуық техникалық тұз өндіреді. Біздің өнімдер Әзербайжан, Қырғызстан, Өзбекстан, Ресей, Германия мемлекеттеріне экспортталады. 

Бүгінде зауытта мыңнан астам адам еңбек етеді. Олар ас тұзы мен техникалық тұздың бірнеше түрін дайындайды. Ал дайын өнімнің қаптамасы өндіріс орнының жанындағы полимер цехында жасалады. 

Авторлары: Нұрлан Жақыпбеков, Ақан Әлиев