Майқапшағай бекетінің әлеуеті артты

«Майқапшағай» бақылау-өткізу пунктінің көлік өткізу әлеуеті артты. Бұрын бекеттен тәулігіне 200 көлік өтетін болса, қазір екі жарым есе көбейді. «Қытаймен арадағы сауда-саттық көлемі ұлғайып, логистика қарқынды дамитын болды», - дейді мамандар. Әрі шекараға дейінгі тасжол жөнделіп, жолаушыларға да қолайлы жағдай жасалды.  

Қалбатау-Майқапшағай тасжолының жөнделуін өңір халқы сегіз жылдан аса күтті. Ары-бері ағылған жолаушыларға ой-шұңқыры көп жолмен жүру оңай болмады. Әсіресе ел мен елдің арасында жүк тасымалдайтындар жол азабын тартты. Қазір бұл жол тақтайдай тегіс.

Руслан Қасанов, көлік жүргізуші:

- Алдында келген жігіттердің барлығы мына жақтағы жол жаман болды деп айтып жатыр. Біз бірінші рет келіп тұрмыз, жол өте жақсы, керемет жасалған.

Жолдан бөлек шекара шебіндегі өткізу пункті де жөндеуден өтті. Бұған дейін бекетте жүк көліктері иін тіресіп тұрып қалатын. Екі жолақты жол тарлық етті. Президент тапсырмасына сай, маңызды нысан толық жаңғыртылды. Кіре беріс жол алты жолақты болып, заманауи ғимарат салынып, шолу алаңы тұрғызылды. Сөйтіп кеден басындағы қызмет оңтайландырылды. 

Әділет Жампейісов, «ҚазАвтоЖол» ҰК ШҚО филиалы директорының орынбасары:

- Бұл деген шекара қызметінде жүктерді толығымен тез таратып, тез өткізуді қамтамасыз етеді. Осы өзгерістер арқылы заманға сай үлкен көлемде техника өткізе алатындай кеден, Майқапшағай кедені сондай жағдайға жетті деп айта аламыз.

Мұнда әрқайсына 100 көлік сиятын автотұрақ салынып жатыр. Жақында санитарлық аумақ пен электронды кезек мәселесі де шешіледі. Сонымен қатар демалыс орындарының да құрылысы аяқталады.

Мақсұтбек Сәлімғожинов, жоба жетекшісі:

- Асфальт жұмыстарын бітірдік. 16 мың шаршы метрден көп үш қабат асфальт салынды, қалғанын бітіріп жатырмыз. Демалыс орны шет елге кіретін жүк тасымалшыларына шетелдік көліктерге ыңғайлы болсын деп осы демалыс орнын салып жатырмыз.

Бекеттен бұрын тәулігіне 200 автокөлік өтетін болса, жаңғыртудан кейін бұл көрсеткіш 2,5 есе артты. Шекарадағы маңызды логистикалық дәліз енді өзге ірі жобалара жол ашты. 

Эльмира Ахметова, тілші:

- Транзиттік жүк тасымалын арттыру - өткізу пунктіндегі мүміндікті кеңейтумен ғана шектелмейді. Өлкеде бұл бағытта бірнеше жоба жоспарланған. Соның бірі көрші елдермен ежелгі сауда жолын қайта жаңғырту. Мәселен, Тұғыл ауылы маңында өзен портын салу көзделіп отыр. Сонымен қатар ол жерден Қытай шекарасына дейін теміржол салынуы мүмкін. Осылайша күре жол, әуе жолы, су жолы темір жолы түйіскен бірегей хаб пайда болады.

Авторлары: Эльмира Ахметова, Жігер Бабаханов