Ақтауда Біздің аула байқауы өтіп жатыр

Маңғыстау облысында ең таза аула, ең таза тұрғын үй кешені, ең үздік аула сыпырушы мен өз бизнес аумағын айнадай жарқыратып ұстаған ең үлгілі кәсіпкер анықталады.

Аталған жоба «Таза Қазақстан» ұлттық қозғалысы аясында ұйымдастырылды. Байқау жеңімпаздары дипломдар мен бағалы сыйлықтарға, ең бастысы жерлестерінің құрметіне ие болады.

Ақтау қаласындағы мына 5 қабатты үй жүргіншілердің назарын еріксіз өзіне аударады. Ерлі-зайыпты Юрий және Татьяна Никоненколар көршілерін жұмылдыра отырып, үйдің алдын жасыл оазиске айналдырыпты. Татьянаның гүл өсірудегі тәжірибесін жерлестері әлдеқашан мойындаған. Терезе алдындағы бақытгүлдер мен лалагүлдер, раушан мен жалбыз, жаужапырақтар ауаны ғана емес, сананы да өзгертеді. Оған түрлі мүсіндер мен ойыншықтар, сәндік өрнектер қосылғанда ауланың ажары еніп қалған.

Татьяна Никоненко, Ақтау қаласының тұрғыны:

- Аулада дәннен жетілген 3 анар өсіп тұр. Біреуі тіпті биік боп жетілді, биыл гүлдей бастады. Жеміс-жидектің бәрі де біздің ауа райында өседі деп сеніммен айта аламын. Ең бастысы, дұрыс күтім, уақтылы суару. Егер байқаудан ұтып, жүлделі боп жатсақ, мына ескі теректердің орнына жаңа көшеттер отырғызғымыз келеді.  

Жасыл желекті суару ісі толық автоматтандырылған. Таңғы 4-те су өзі қосылады, жарты сағаттан соң қайта айрылады. Юрий Никоненко түрлі қосымшалар арқылы өсімдіктерді суарып қана қоймай, жай-күйін де бақылап отырады. Үйдің жан-жағына бақылау камералары мен жарық қосқыштар орнатқан.

Юрий Никоненко, Ақтау қаласының тұрғыны:

- Сонымен қатар мен подьезге ақылды жарық пен ақылды үй қондырғысын орнаттым. Барлығы да дауыс көмекшісі арқылы жұмыс істейді. Көршілерім мені қазір Кулибин деп те атайды.  

Аталған үйдің тұрғындары қалалық байқауға осымен екінші рет қатысуда. Былтыр екінші орынға ие болса, биыл екі аталым, «Үздік аула» мен «Үздік подьезд» аталымы бойынша өтініш беріпті. Қала тазалығына сүбелі үлес қосатын байқауға биыл жұмысшы мамандықтар жылы болғасын «Үздік аула сыпырушы» аталымы қосылыпты. 

Кирилл Осин, байқау ұйымдастырушысы:

- Өйткені аула сыпырушылар қандай ауа-райына қарамастан, таң бозынан көшеге шығып, үйдің айналасын тазалайды. Көң-қоқысты жинап шығарады. Сондықтан олардың еңбегі зор құрметке лайық. Сондай-ақ биыл бірінші рет өз аумағын мұнтаздай ғып ұстаған мемлекеттік мекемелер де байқауға қатысуда.  

Жоба жеңімпаздары 10 желтоқсан күні анықталмақ. Байқаудың жүлде қоры 1 млн 200 мың теңге. «Ең бастысы, сыйақы емес, қала тұрғындарының тазалыққа құштар жерлестеріне қалқысыз құрметі», - дейді ұйымдастырушылар. 

 Е.Жылқайдарұлы, Тамара Степанова, Саламат Бекбаев