Ақтаудағы музейде Этнография залы ашылды

Ақтаудағы Әбіш Кекілбайұлы атындағы Маңғыстау облыстық музейінде жаңа «Этнография» залы ашылды.

Экспозицияның басты ерекшелігі – «Маңғыстаудың күміс әлемі» көрмесі. Мұнда 250-дей бірегей әшекей бұйым қойылған: көне шашбаулар мен сырғалар, ат әбзелдері, сердолик тасы орнатылған сирек әшекейлер және салмағы бір жарым келі тартатын сәукеле де бар. Көрмеге қойылған жәдігерлер – өңірдің құнды мәдени мұрасы. Экспозициядағы ерекше назар аударатын дүниелердің бірі 13 домбырадан тұратын коллекция. Бұл аты аңызға айналған күйші-жыраулар Қашаған Күржіманұлы, Қарасай Қалыұлы, Өсербай Сәрсенбайұлының қолданған аспаптары. Мамандардың айтуынша, көрме жарты жылдан астам уақыт бойы жүйелі түрде жинақталған. Жаңа экспозиция өңірдің мәдени өміріндегі нағыз тартымды орталыққа айналмақ.

Бағытжан Құдайбергенұлы, Ә. Кекілбаев атындағы облыстық тарихи-өлкетану музейінің бөлім меңгерушісі:

- Жалпы Маңғыстаудың зергерлік өнері Қазақстанның басқа аймақтарында қайталана бермейтін ерекше құбылыс. Бұл жердегі бұйымдар музей қорына жылдар бойы жинақталып келген өткен ғасырдан бастау алатын осындағы Маңғыстау қазақтарының жас ерекшеліктеріне қарай қолданған түрлі әшекейлері. Бұл аталған көрме Маңғыстауға аяқ басқан кез келген қазақстандық болсын, шетел азаматы болсын өз өлкемізідң азаматы болсын «Маңғыстау» деген сөзден қандай түсінік алғысы келеді және Маңғыстау деген не деген кезде, осы зал арқылы, осы күміс әшекейлер арқылы Маңғыстаудың тылсым дүниесімен таныса алады деген ойдамыз.