Рим төрінде Қазақстан залы ашылды

Біріккен Ұлттар Ұйымы Азық-түлік және ауыл шаруашылығы ұйымының Рим қаласындағы штаб-пәтерінде «Қазақстан» залы ашылды. Іс-шараға Қазақстан Республикасының Сыртқы істер министрі Ермек Көшербаев пен Біріккен Ұлттар Ұйымы Азық-түлік және ауыл шаруашылығы ұйымының Бас директоры Цюй Дуньюй қатысты.

Тина Миттендорф, БҰҰ Азық-түлік және ауыл шаруашылығы ұйымы нысандарын басқару жөніндегі аға қызметкер:

- БҰҰ-ның Азық-түлік және ауыл шаруашылығы ұйымы штаб-пәтеріндегі «Қазақстан» залы ғимараттың дәл ортасында орналасқан. Кеңістік көпфункционалды аймақ ретінде қайта құрылды. Бұл орын әртүрлі мақсатта, күнделікті уақытта демалу, бейресми кездесулер өткізу, ал қажет болған жағдайда маңызды жиындар ұйымдастыру үшін пайланалылатын болады.

Флавия Кьярелло, «Қазақстан» бөлмесінің сәулетші-дизайнері

- Безендіру жұмыстары кезінде қазақтың киіз үйінің пішіні шабыт берді. Залдың төбесі мен ішін сондай етіп безендіруге тырыстық. Қазақстан туының дәстүрлі көк және алтын түстері, ұлттық өрнектер қолданылды. Барлық жұмыстар ғимараттың архитектуралық ерекшелігіне сай үйлесімді болуына көп мән бердік.

Бұл орын жоғары деңгейдегі кездесулер өтетін алаң ғана емес, сонымен қатар бейресми қарым-қатынас алаңына айналады. Министр Ермек Көшербаев өз сөзінде бұл бөлменің ашылуы ізгі ниеттің көрінісі, әрі Қазақстанның көпжақты ынтымақтастықтың ортақ мақсаттарына адалдығының жарқын дәлелі екенін атап өтті.

Родриго Де Лапуэрта Монтойя,  БҰҰ Азық-түлік және ауыл шаруашылығы ұйымы логистикалық қызметтер департаменті директоры:

- Бүгін – тарихи күн. Біз Қазақстан үкіметінің қолдауымен штаб-пәтеріміздегі басты орын - көпфункционалды залды - салтанатты түрде ашып отырмыз. Мұнда маңызды кездесулер өтетін болады. Мен үшін ең бастысы қонақжайлылық, ал қазақстандықтар дәл осы қасиетімен танымал. Сондықтан бұл залдың есігі әрқашан ашық болады.